Njohësi i marrëdhënieve ndër etnike të Kosovë, Fatmir Sheholli ka paralajmëruar largimin e serbëve nga institucionet edhe nëpër komunat tjera të vendit, pra jo vetëm në veri.
Ky paralajmërim i Shehollit vjen pas deklaratës së nënkryetarit të Listës Serbe, Dalibor Jevtiq, I cili u ka bërë thirrje edhe serbëve të jugut që të largohen nga institucionet e Kosovës, në rast se nuk ka ndryshim të qëndrimit të Qeverisë së Kosovës.
Sheholli për Blic ka theksuar se nëse nuk tërhiqet vendimi për targa dhe nëse nuk nis krijimi i Asociacionit, atëherë të gjithë serbët i bojkotojnë institucionet e Kosovës.
“Ashtu siç kemi paralajmëruar si Institut për Afirmimin e Marrëdhënieve Ndëretnike, edhe serbët poshtë lumit Ibër janë të rreshtuar me Listën Serbe. Në këtë kuptim, kryetarët e 6 komunave me shumicë serbe (Graçanicë, Novo Bërdë, Shtërpc, Kllokot, Partesh dhe Ranillug) janë në koordinim me kryetarin e Listës Serbe e përmes tij me Beogradin zyrtar, që nëse në ditët në vazhdim kryeministri Kurti nuk ndërron vendimin për targa dhe nuk fillon krijimin e ASK, atëherë pritet që edhe kryetarët e komunave, asamblistë serbë të këtyre komunave do të largohen nga institucionet e Kosovës”, ka theksuar ai.
Ai shprehet i bindur se largimi i tyre mund të ndodhë në momentin kur fillon gjobitja e serbëve nga 21 Nëntori.
Ndryshe, sot nënkryetari i Listës Serbe, Dalibor Jevtiq u ka bërë thirrje edhe serbëve të jugut që të largohen nga institucionet e Kosovës, në rast se nuk ka ndryshim të qëndrimit të Qeverisë së Kosovës.
Sipas Jevtiq, gjendja aktuale në Kosovë është më e keqe në krahasim me periudhën kur serbët shpallën daljen e tyre nga institucionet e Kosovës dhe e gjithë kjo thotë ai, është rezultat i politikës së papërgjegjshme të qeverisë së Kosovës.
Jevtic shtoi se nëse nuk ka ndryshim të qëndrimit, edhe serbët në jug të Ibrit duhet të largohen nga institucionet e Prishtinës.
“Ky është qëndrimi im, ky është qëndrimi i kolegëve të mi. Unë personalisht e kam njoftuar me shkrim edhe kryetarin e Listës Serbe, Rakiq, se besoj se përfaqësuesit politikë të serbëve, që serbët në përgjithësi në jug të Ibrit duhet të largohen nga institucionet dhe kjo është një pyetje që është ende aktuale dhe e hapur. Nëse nuk ndryshon situata, nëse nuk ndryshon kursi dhe qëndrimi i Prishtinës zyrtare dhe nuk ndalet dhuna institucionale ndaj serbëve, jam pothuajse i sigurt se të njëjtin vendim do ta marrin edhe serbët në jug të Ibrit”, thotë Jevtiq për Euroneës Serbia.
Ai shprehet se dy kushtet për t’u rikthyer në institucione janë formimi i Asociacionit dhe tërheqja e vendimit për targat.
“Përgjigja në pyetjen se a do të ktheheshin hipotetikisht serbët në veri të Kosovës dhe në institucione, jepet në momentin kur ndryshohet vendimi dhe shtyhet ai vendim për riregjistrimin e veturave dhe kur fillon formimi i Asociacionit”, thotë Jevtiq
