Parashikimi i fundit afatgjatë për pranverën e këtij viti tregon ndikimin e mundshëm të La Ninës në motin sezonal në Evropë. Parashikohet një sistem dominues i presionit të lartë mbi kontinent, ndërsa presioni i ulët do të jetë në perëndim dhe në veri-perëndim.
Sezoni meteorologjik i pranverës zgjat 3 muaj dhe përfshin marsin, prillin dhe majin. Kjo është një periudhë kalimtare nga dimri në verë, ndaj mund të priten shumë dinamika, raporton Severe Weather në parashikimin më të fundit.
Mendohet se ngjarja oqeanike La Nina do të ketë një rol të papritur këtë sezon. Zakonisht është e vështirë të gjesh ose të shohësh ndonjë ndikim të vërtetë të La Ninës në Evropë.
Një nga faktorët kryesorë të këtij sezoni është La Nina në pjesën tropikale të Oqeanit Paqësor.
Megjithatë, ndonëse ka pasur forcim në dy muajt e fundit, ka vetëm disa tregues bazë për sa do të ndikojë ajo në pranverën e vitit 2025 në Evropë. Parashikohet që La Nina të mbetet të paktën deri në fillim të pranverës. Por ndikimi atmosferik i anomalive kaq të mëdha mund të zgjasë më shumë, duke mbuluar gjithë sezonin e pranverës në hemisferën e veriut.
La Nina mund të sjellë pranvera më të ngrohta dhe më të thata në disa pjesë të Evropës qendrore dhe perëndimore. Por reshje më të shumta mund të shihen në pjesët jugperëndimore, perëndimore dhe veriore të Evropës, si dhe mbi Detin Mesdhe.
Severe Weather Europe përdor dy modele sezonale për prognozën: ECMWF (Qendra Evropiane e Parashikimeve të Kohës së Mesme) dhe modeli UKMO nga Zyra Meteorologjike e Britanisë së Madhe.
ECMWF: Më pak reshje gjatë pranverës
Parashikimi i zgjeruar i ECMWF tregon një presion të lartë në qendër të Evropës Qendrore dhe Lindore. Zona e presionit të ulët ndodhet në Atlantikun e Veriut dhe mbi Evropën Veri-perëndimore, që është një ndikim tipik i pranverës nga La Nina. Duke parë prognozën e temperaturës së sipërfaqes, shihet një model më të ngrohtë për shumicën e Evropës Qendrore dhe Veriore.
Kjo është për shkak të zonës së presionit të lartë dhe rrjedhës jugperëndimore nga zona e presionit të ulët në Atlantik. Shikohet gjithashtu një tendencë për temperatura normale deri më të ulëta në jugperëndim dhe disa pjesë të Evropës Qendrore dhe Juglindore. Për muajin mars, parashikohet më pak reshje në pjesën më të madhe të Evropës Qendrore dhe Lindore. Përsëri, kjo është për shkak të ndikimit të zonës me presion të lartë.
Megjithatë, reshje më të shumta mund të shihen në pjesët jugore, perëndimore dhe veriore, nën ndikimin e zonës së presionit të ulët nga Atlantiku i Veriut dhe mbi Detin Perëndimor të Mesdheut.
Anomalia e presionit të lartë mbi Evropë është tipike për pranverën e La Ninës, ndaj ka mundësi që ky model të jetë disi i lidhur me ndikimin e saj global. Anomalitë më të ngrohta të temperaturave dhe kushtet më të buta janë më të mundshme në pjesën perëndimore, qendrore dhe në lindje. Pjesët qendrore dhe perëndimore ka shumë mundësi të shohin fronte të rastit Atlantikut nga perëndimi/veriperëndimi, nën ndikimin e zonave të presionit të ulët mbi Atlantikun e Veriut.
Sa i përket reshjeve, parashikohet më shumë shi në pjesët jugperëndimore, qendrore dhe veriore të Evropës. Kjo pritet për shkak të zonës më të ulët të presionit të sipërfaqes mbi Evropën jugperëndimore dhe zonës më të gjerë të presionit të ulët mbi Atlantikun e Veriut për pjesët veriore. Në kombinim me temperaturat më të ulëta, kjo gjithashtu ndikon në mundësinë e reshjeve të dëborës në pranverën e hershme.
Megjithëse pranvera është e njohur si fillimi i periudhës më të ngrohtë të vitit, mund të ketë ende reshje dëbore, veçanërisht në mars. Sidoqoftë, sipas parashikimeve më të fundit për reshjet e dëborës nga marsi deri në maj 2025, pjesa më e madhe e kontinentit ka reshje dëbore nën nivelin e zakonshëm. Natyrisht, kjo nuk do të thotë që nuk do të ketë reshje dëbore, por thjesht do të thotë që ato janë më të rralla se mesatarja në 30 vitet e fundit. Një front i ftohtë me ajër të ftohtë të përshtatshëm mund të sjellë një sasi të madhe reshjesh dëbore në pjesët qendrore të Evropës, por kjo pritet të mos shfaqet në mesataren mujore.
Modeli UKMO: Temperatura më të larta
Modeli UKMO tregon një parashikim pak më ndryshe nga ECMWF.
Ai tregon një zonë presioni të lartë me qendrën mbi Evropën Perëndimore dhe një sinjal të zonës së presionit të ulët mbi Atlantikun e Veriut të largët.
Zona e presionit të lartë shtrihet gjithashtu në lindje, duke mbuluar pjesën më të madhe të Evropës. Parashikimi i temperaturës tregon kryesisht kushte më të ngrohta se normalja në pjesën më të madhe të kontinentit, veçanërisht në rajonet veriore dhe verilindore.
Sa i përket reshjeve, shihen kryesisht kushte më të thata në pjesët qendrore dhe perëndimore të Evropës. Kjo është kryesisht e pritur, duke pasur parasysh prognozën e presionit të lartë nga ky model.
Por, Evropa veriore dhe jugore parashikohet të ketë më shumë reshje pranverore, që tregon ndikimin e zonës së presionit të ulët në veri dhe zonës së presionit të ulët mbi Detin Mesdhe.
Më shumë reshje dëbore pranverore parashikohen në Skandinavinë veriperëndimore, ku temperaturat janë ende mjaft të ulëta dhe zona e presionit të ulët sjell shumë reshje. /telegrafi/
