Pasuria e Presidentes Osmani: Sivjet bleu “banim në varg” në vlerë gjysmë milioni euro, ka edhe 150 mijë euro borxh

Presidentja e vendit, Vjosa Osmani, ka bërë deklarimin e përvjetshëm të pasurisë në Agjencinë Kundër Korrupsionit.

Nga pasuria e paluajtshme, Osmani ka deklaruar një banesë rreth 60 mijë euro, garazh kolektive në vlerë 6 mijë euro si dhe një shtëpi që kap vlerën e 180 mijë eurove, shkruan gazeta online Reporteri.net.

Të tria këto janë në pronë të bashkëshortit të saj, dhe ka thënë se i ka blerë ose ndërtuar me kredi dhe kursime.

Presidentja Osmani po ashtu ka në pronësi të përbashkët 5 ari tokë. Po ashtu në pronësi të përbashkët me Prindon Sadriun, Osmani ka edhe një “banim në varg” në vlerë 170 mijë euro, dhe një tjetër të blerë në vitin 2023, që kushtoi hiç më pak se 520 mijë euro.

Vetura që ka deklaruar në pronësi të bashkëshortit është veturë e tipit Mercedes e blerë në vitin 2022, dhe që ka kushtuar 12 mijë euro.

Sa i përket kursimeve në bankë, presidentja e vendit numëron rreth 330 euro nëpër disa banka.

Osmani ka edhe borxh në vlerë 150 mijë euro.

Nga të hyrat vjetore si presidente, Vjosa Osmani fiton 33 mijë euro në vit. 3 mijë e 320 euro të tjera, ajo i merr nga qiratë në Australi. /Reporteri.net/.