Një incident i rëndë me përleshje fizike është regjistruar në orët e hershme të 20 dhjetorit 2025 në Prishtinë, ku dy persona janë përfshirë në një konflikt të dhunshëm që ka eskaluar në përdorim mjetesh të forta.
Sipas informatave që ka siguruar Sinjali, rreth orës 02:00, në rrugën “Enver Hadri”, të dyshuarit H.B., rreth 82-vjeçar dhe A.H., rreth 71-vjeçar janë sulmuar fizikisht mes vete, duke përdorur çekiç, çka ka rezultuar me lëndime të lehta trupore për të dy palët.
Njësia policore ka dalë menjëherë në vendngjarje, ku gjatë ndërhyrjes ka konstatuar se i dyshuari H.B. kishte nxjerrë nga trupi një mjet të mprehtë – thikë, e cila është sekuestruar.
Për shkak të gjendjes shëndetësore, të dy të dyshuarit janë dërguar në QKUK për tretman mjekësor dhe nuk kanë qenë në gjendje të intervistohen në momentin e parë.
Lidhur me rastin është njoftuar Prokurori Kujdestar, i cili ka udhëzuar që ndaj të dyshuarve të inicohet rasti “Lëndim i lehtë trupor”, kurse ndaj H.B. të inicohet edhe rasti “Armëmbajtje pa leje – thikë”.
Me vendim të Prokurorit, të dyshuarit janë liruar në procedurë të rregullt, ndërsa rasti mbetet nën hetime./Sinjali
