Përurohet kabineti i shkencave natyrore në Shkollën “Shefki Kuleta” në Bellopojë

Nxënësit e Shkollës “Shefki Kuleta” në Bellopojë do të kenë mundësi që lëndët e shkencave natyrore t’i mësojnë në laboratorin e ri, i cili u përuruar sot në një ceremoni të organizuar në bashkëpunim me KFOR-in Turk në Kosovë.

Në këtë ceremoni mori pjesë Nënkryetarja e Komunës, Marigona Lahu, e cila e vlerësoi këtë projekt me vlerë të madhe për nxënësit e kësaj Shkolle.

Sipas saj, ky projekt është si rezultat i bashkëpunimit të frytshëm me KFOR-in Turk, i cili ndër vite ka dëshmuar se nuk është vetëm një forcë paqëruajtëse, por edhe një partner i përkushtuar për zhvillimin e vendit.

“Kontributi i KFOR-it Turk në këtë projekt është një dëshmi e qartë e përkrahjes së kësaj force edhe në arsim”, tha Lahu.

Ndërsa, Komandanti i Kryesisë së Këshillit Turk, Ersin Çelikkanat, theksoi se për 26 vjet punojnë në fusha të ndryshme në Kosovë me qëllim që të ndikojnë pozitivisht në jetën e popullit të Kosovës. Ai iu tha nxënësve se ky laborator do t’ua bëjë më interesante lëndët mësimore dhe se çdo minutë që kalojnë aty do të ndikojë pozitivisht në marrjen e njohurive.

Ndërkohë, drejtori i kësaj Shkolle, Xhemajl Kuleta, e ka falënderuar KFOR-in Turk për këtë laborator, që përfshin edhe pajisje tjera, e i cili do t’u ofrojë nxënësve mundësi më të mira për mësimnxënie në lëndët e shkencave të natyrës.

Në këtë ceremoni i pranishëm ishte edhe Kryesuesi i Kuvendit Komunal, Hilmi Hoxha, drejtori për Arsim, Avni Fetahu, zyrtarë tjerë, mësimdhënës, nxënës e prindër.