Komuna e Podujevës do të lidh marrëveshje bashkëpunimi me Qendrën Akademike të Arsimit të Artizanateve në Shtutgart, me qëllim të shkëmbimit të përvojave profesionale të mësimdhënësve, organizimin e trajnimeve mbi teknologjitë e reja, si dhe zhvillimin e praktikave për nxënës në zona industriale.
Për këtë qëllim drejtori për Arsim, Avni Fetahu, bashkë me drejtorin e IAAP “Fan S. Noli”, Fatmir Emini, po qëndrojnë në vizitë në Gjermani, ku sot janë pritur nga Christian Binnig nga kjo Qendër.
Gjatë këtij takimi u diskutuan tema me rëndësi të veçantë që lidhen me zhvillimin e praktikave profesionale në shkolla, forcimin e bashkëpunimit shkollë – biznes, përfshirjen e praktikës së nxënësve në përditësimin e kurrikulave dhe përgatitjen e nxënësve për tregun e punës.
Drejtori Fetahu theksoi se qëllimi kryesor i këtij bashkëpunimi është që arsimi profesional të jetë në përputhje me nevojat reale të ekonomisë, të rritet cilësia e mësimdhënies dhe që nxënësit të aftësohen për punë.
Pas këtij takimi u propozuan edhe hapa konkretë, përfshirë formimin e një grupi të përbashkët pune, realizimin e pilot-projekteve dhe hartimin e një plani veprimi me përgjegjësi dhe afate të qarta.
“Komuna e Podujevës mbetet e përkushtuar në avancimin e arsimit profesional dhe ndërtimin e urave të bashkëpunimit me institucione dhe partnerë ndërkombëtarë në funksion të zhvillimit të qëndrueshëm dhe punësimit të të rinjve”, tha Avni Fetahu.
Në takim morën pjesë edhe Driton Azemi nga Dogana e Kosovës si dhe Baki Abdullahu, përfaqësues i Kompanisë “Baki Automobile”.
27.01.2026, Podujevë
Zyra për Marrëdhënie me Publikun dhe Informim
