Kryetari i Komunës së Podujevës, Shpejtim Bulliqi, ka njoftuar nisjen e një projekti të rëndësishëm që synon përmirësimin e furnizimit me ujë të pijshëm për qytetarët e Podujevës dhe disa fshatra përreth.
Sipas tij, në bashkëpunim me Ministrinë e Ekonomisë dhe KRU “Prishtina”, do të realizohet investimi për shtrirjen e gypit të ri të ujit nga Fabrika e Përpunimit të Ujit në Shajkovc deri në qytetin e Podujevës, në gjatësi prej 8.5 kilometrash.
Projekti parashihet të përfshijë edhe zgjerimin e rrjetit të ujësjellësit në drejtim të fshatrave Sfeçël, Gllamnik, Llapashticë dhe Katunishtë, duke krijuar kushte më të mira për furnizim të qëndrueshëm me ujë të pijshëm.
Bulliqi ka falënderuar Ministren e Ekonomisë, Artane Rizvanolli, si dhe kryeshefin ekzekutiv të KRU Prishtina, Arsim Fetahu, për mbështetjen dhe angazhimin në realizimin e këtij projekti.
Ai ka theksuar se investimet në infrastrukturën e ujit mbeten prioritet dhe se bashkëpunimi institucional do të vazhdojë edhe me projekte të tjera në shërbim të qytetarëve të Podujevës.
