Një shtyllë elektrike prej betoni në Rrugën “Tetova” është anuar rëndë dhe paraqet rrezik serioz për banorët dhe kalimtarët.
Sipas banorëve, shtylla është dëmtuar dhe aktualisht mbahet e mbështetur në gardhin e një shtëpie private, ndërsa kabllot elektrike janë varur shumë ulët, duke iu afruar sipërfaqes së tokës.
Gjendja është veçanërisht shqetësuese për fëmijët dhe nxënësit që kalojnë çdo ditë në këtë pjesë të rrugës, pasi kabllot e varura mund të përbëjnë rrezik për kontakt të rrezikshëm elektrik.
Po ashtu, banorët shprehen të shqetësuar se një rrëzim i mundshëm i shtyllës mund të shkaktojë pasoja për këmbësorët apo automjetet që qarkullojnë në këtë rrugë.
Banorët thonë se, pavarësisht rrezikut të evidentuar, deri më tani nuk është ndërmarrë ndonjë masë për sanimin e problemit.
Ata u bëjnë thirrje urgjente institucioneve kompetente dhe kompanisë së distribuimit të energjisë elektrike që të ndërhyjnë sa më shpejt dhe të sigurojnë zonën, duke bërë zëvendësimin ose sanimin e shtyllës, para se situata të përshkallëzohet dhe të rrezikohet jeta e dikujt.
