Policia e Kosovës ka realizuar një operacion të gjerë kundër krimit të organizuar pas shpërthimit në parkingun e QKUK-së në Prishtinë, duke ndaluar 11 persona të dyshuar dhe sekuestruar armë, drogë, telefona dhe dëshmi të tjerë, raporton Gazeta Sinjali.
Sot, në zbatim të urdhëresës së Gjykatës Themelore në Prishtinë, Policia kryesoi bastisje në tri lokacione – dy në Prishtinë dhe një në fshatin Rimanishtë.
Veprimet u realizuan nga Drejtoria kundër krimit të organizuar dhe krimeve të rënda në bashkëpunim me organet e drejtësisë.
Gjatë kontrolleve, u sekuestruan prova të shumta, si: në rrugën “Fan Noli” në Prishtinë, është sekuestruar një telefon mobil i llojit iPhone 12, një laptop “Lenovo” dhe dokumente të ndryshme.
Në rrugën “Pavarësia” në Prishtinë, janë sekuestruar katër telefona celularë Samsung, një telefon celular iPhone 14 Pro Max, një palë pranga metalike, një radio lidhje Baofeng dhe gjashtë fishekë të armës së shkurtër të kalibrit 9×19 mm.
Kurse, në fshatin Rimanishtë të Prishtinës, Policia ka sekuestruar një pistoletë e llojit “Sig Sauer” me një karikator dhe 12 fishekë, një armë automatike AK-47 me pesë karikatorë, 99 fishekë dhe një thikë (bajonetë), tre telefona (iPhone dhe Samsung) dhe sasi të konsiderueshme të substancës narkotike (dyshohet për marihuanë), mjete për kultivim dhe përpunim të saj.
PK njofton se Gjatë bastisjes në këtë lokacion, është ndërhyrë edhe nga njësia e Antidrogës – DHTN Prishtinë, e cila ka marrë në kompetencë trajtimin e mëtejshëm të rastit për narkotikë.
“Në vazhdim të veprimeve janë sekuestruar dëshmitë si në vijim: Janë konfiskuar 142 kg e 172 gr substancë narkotike (Kanabis Sativa) në fazë përfundimtare të përpunimit, një armë Sig Sauer 9×19 mm me karikator dhe 12 fishekë, një armë AK-47, 5 karikatorë, 99 fishekë dhe 1 bajonet, dhjetë (10) telefona dhe pajisje të tjera relevante për rastin.”
“Gjatë verifikimit të të dyshuarit F.D., është konstatuar se ndaj tij ekziston një urdhër arrest aktiv për çështje të narkotikëve, dhe me vendim të prokurorit, ai është dërguar për vuajtje të dënimit.”
Ndërkaq, pas intervistimit të personave të ndaluar dhe në konsultim me prokurorin kompetent, nëntë (9) persona janë ndaluar për 48 orë, ndërsa ndaj të tjerëve procedurat janë ndarë në raste të veçanta dhe janë njoftuar njësitë përkatëse për trajtimin e mëtejshëm të tyre.”, thuhet tutje në njoftimin e PK-së.
