Mosmarrëveshjet për prona po vazhdojnë të shkaktojnë përleshje e telashe të shumta mes qytetarëve, të cilat shpesh edhe eskalojnë në kërcënime serioze. Raste të tilla ndodhin edhe brenda familjeve, ku vëllezërit apo anëtarët e tjerë kapen keq me njëri-tjetrin dhe për pasojë përfundojnë në Polici, raporton Gazeta Sinjali.
Burimet nga Prokuroria kanë bërë me dije se një rast i tillë ka ndodhur mbrëmë në rrugën “Ali Duli” në Hajvali të Prishtinës, ku janë përfshirë dy vëllezër, V.B., dhe A.B.,
Sipas informacioneve të para, palët fillimisht kanë pasur një zënkë mes vete, për shkak se nuk po merreshin vesh për një pronë, e cila iu shkaktoi telashe dhe i futi në sherr me Policinë. Përballë kësaj situate, dikush nga familja e ka njoftuar Policinë për atë që ka ndodhur, me ç’rast një njësi policore ka intervenuar
Si rezultat i denoncimit, Policia ka dalë në vendin e ngjarjes për të marrë më shumë informacione dhe më pas ka shoqëruar personat e përfshirë në stacion policor, ku kanë dhënë deklaratat e tyre në lidhje me rastin.
Pas përfundimit të procedurave policore, Prokurori i Shtetit ka urdhëruar inicimin e rastit ndaj të dyshuarve dhe nisjen e hetimeve për veprën penale “Dhunë në familje”.
