Prokuroria Themelore në Ferizaj, Departamenti për të Mitur, ka paraqitur propozim për shqiptimin e dënimit me burgim për të mitur, ndaj të miturit lidhur me rastin e vrasjes së zyrtarit policor në Kaçanik, Muhamed Lika.
I mituri, Rejhan Bela dyshohet për kryerjen e veprës penale “Vrasje e rëndë”.
Bela dyshohet se në bashkëkryerje me të dyshuarit e tjerë e kanë vrarë rreshterin Lika në hymjen e banesës së tij mbrëmjen e 1 prillit.
Sipas propozimit të Prokurorisë, i mituri kishte shtënë 4 herë në drejtim të rreshterit Lika
“I mituri në bashkëkryerje me të pandehurit, me dashje dhe përgatitje paraprake ka privuar nga jeta tani të ndjerin- zyrtarin policor M.L., në atë mënyrë që derisa viktima ka përfunduar orarin e punës së detyrës zyrtare dhe gjatë rrugës për në banesën e tij, ishte përcjellë në vazhdimësi nga i mituri dhe të pandehurit deri te hyrja e banesës së tij, ku pasi që hynë në objektin e banesës, duke u ngjitur shkallëve lart, i mituri i shkon mbrapa dhe hynë brenda, me ç‘rast me të takuar të ndjerin ka shtënë katër (4) herë në drejtim të tij me armë zjarri të kalibrit 9.19 mm dhe brenda një intervali kohor rreth 47 sekonda, i mituri del duke vrapuar në drejtim të lokalit ‘Dukagjini’ ku bashkohet me të pandehurin R.M., i cili kishte qenë duke e pritur dhe së bashku largohen përmes rrugës ‘Mejdi Dalloshi’, ku derisa ishin duke vrapuar i mituri, i pandehuri dëgjohet duke thënë ‘Bravo, ik’”, thuhet në propozimin e Prokurorisë.
Rreshteri Lika ishte vrarë më 1 prill të këtij viti.
Të dyshuar për vrasjen e tij janë Rejhan Bela, Haki Bela, Rilind Murati, Vatan Çaka, Edmond Lika, Shkëlqim Kuka dhe Diamant Gashi.
