Shoqëria Austriake për Politike Evropiane (ÖGFE), ka publikuar rezultatet e një sondazhi, sipas të cilit qytetarët austriakë tregohen skeptikë për integrimin e Kosovës në Bashkimin Evropian, raporton Gazeta Sinjali.
Ajo që është edhe më shqetësuese në rastin e Kosovës është se shkalla e refuzimit është 53 për qind, që është më e larta nga shtetet e rajonit, e pasuar nga Mali i Zi me 44 për qind.
Sekretari i përgjithshëm i ÖGFE, Paul Schmidt, përmes një komunikate për media ka thënë se nga shtetet e rajonit të Ballkanit Perëndimor, Bosnja ka shkallën më të lartë të aprovimit për anëtarësim në BE nga qytetarët austriakë.
Schmidt, ka thënë po ashtu se shkalla e ulët e aprovimit të shtetasve austriakë për Ballkanin Perëndimor në BE është pak a shumë konsistente ndër vite.
Në këtë sondazh, austriakët janë shprehur skeptikë, jo vetëm për integrimin e Kosovës në BE, por për të gjithë Ballkanin Perëndimor, po ashtu edhe për Ukrainën dhe Moldavinë.
Përveç kësaj qytetarët austriakë nuk do të mbështesnin as hyrjen e Rumanisë dhe Bullgarisë në zonën Schengen.
