Kosova edhe pak ditë shënon 24 vjetorin e masakrës së Reçakut, ku u vranë mbi 45 civilë të pafajshëm shqiptarë. Nga ish-shefi i misionit vëzhgues të OSBE-së në Kosovë, ambasadori William Walker, kjo masakër u cilësua krim kundër njerëzimit.
Çdo vit logoja për përkujtimin e masakrës së Reçakut kishte ndryshuar. Pjesa e pandryshuar e logos ishte gjithnjë plisi si simbol, shkruan Demokracia.com.
Por, këtë vit një gjë e tillë nuk u bë. Qeveria e Kosovës dhe Komuna e Shtimes e kanë organizuar një ceremoni përkujtimore për 24-vjetorin e kësaj masakre. Megjithatë, ftesa që është dërguar e mban logon që ishte vendosur për përkujtimin e 23-vjetorit.
Kjo është logoja dhe ftesa që janë dërguar nga organizatorët.
Por, e njëjta logo ishte përdorur edhe në përkujtimin e vitit të kaluar dhe kjo konfirmohet edhe në fotografinë e mëposhtme të ambasadorit amerikan.
Më poshtë gjeni disa nga logot e viteve të kaluara, ku në qendër të të cilave ishte i vendosur si simbolikë gjithmonë plisi. Domethënia e kësaj ndërlidhet edhe me të moshuarin Banush A. Kameri, i cili mbante plis dhe kur ishte gjetur i masakruar, pa kokë, kriminelët serbë në vend të kokës ia kishin lënë plisin, shkruan Demokracia.com.
Madje, plisi si simbol është i vendosur edhe në hyrjen e kompleksit përkujtimor në Reçak.
Më 15 janar 1999, në fshatin Reçak u vranë dhe u masakruan barbarisht afër 50 shqiptarë të paarmatosur. Në orët e hershme të mëngjesit të 15 janarit, Reçaku ishte zgjuar i rrethuar. Sipas dëshmitarëve, aty rreth orës 06:30, forcat serbe me artileri të rëndë kishin filluar ta bombardojnë fshatin. Pas ndërprerjes së bombardimeve, forcat serbe ishin futur në fshat dhe kishin filluar bastisjet.
Masakra e Reçakut zgjoi ndërgjegjen e diplomacisë botërore, duke u mobilizuar për Kosovën. Tmerret e shkaktuara në fshatin Reçak sollën në vëmendje gjithë botën e civilizuar, pasi që kjo masakër shpalosi të vërtetën rreth planit gjenocidal të ish-kriminelit Sllobodan Millosheviq.
Pas Reçakut, çështja e Kosovës arriti në një konferencë ndërkombëtare në Rambuje e në Paris, mossuksesi i të cilës rezultoi me ndërhyrjen e NATO-së kundër forcave ushtarake serbe, largimin e tyre nga Kosova dhe vendosjen e administratës ndërkombëtare në Kosovë.
Reçaku atëbotë kishte zënë vend në mediat dhe kancelaritë e shteteve më me ndikim në botë. Ish sekretarja e shtetit, Madeleine Albright, e kishte dëgjuar lajmin dhe ishte zgjuar me ankth se çdo t’i sillnin orët në vijim Kosovës.
Ndërkaq, shefi i misionit të OSBE-së, William Walker, kishte shkuar në vendin e krimit shumë shpejt dhe kishte drejtuar gishtin nga lugina e masakrës, duke e përcaktuar krimin me tri fjalë: krim kundër njerëzimit.
Pas masakrës së Reçakut, rifilluan luftimet 48 orësh mes UÇK-së dhe forcave serbe për marrjen e kufomave. Serbia donte t’i zhdukte gjurmët e krimit, por kjo tentativë e tyre dështoi. Bota e pa krimin.
