Një vendim i Kuvendit Komunal të Prishtinës për dhënien në shfrytëzim të UP-së të një parcele toke komunale, për ndërtimin e Objektit të Fakultetit të Shkencave Matematike-Natyrore (FSHMN) dhe Fakultetit Ekonomik, po pengohet nga Qeveria e Kosovës, përmes MAPL’së. Ekzekutivi qendror po pretendon se kërkesën në fjalë është dashur ta bëjë Ministria e Arsimit e jo Universiteti “Hasan Prishtina”. Komuna që drejtohet nga Përparim Rama, e ka ndarë mendjen. Tokën do t’ia japë UP’së. Për këtë ka gjetur edhe bazën ligjore. Projekti për ndërtimin e objekteve të reja për fakultetet do të financohet nga BE-ja. 

Kuvendi Komunal i Prishtinës në fund të muajit të kaluar ka marrë vendim për dhënien në shfrytëzim të pronës së paluajtshme të komunës nga ana Universitetit të Prishtinës “Hasan Prishtina”.

Vendimi është marrë pas kërkesës së Universitetit i Prishtinës “Hasan Prishtina”, gjegjësisht Rektorit të UP-së, për shfrytëzimin e pronës komunale, me qëllim të ndërtimit të objektit të Fakultetit të Shkencave Matematike – Natyrore (FSHMN) dhe Fakultetit Ekonomik.

Por, ligjshmëria e vendimit të miratuar në Kuvendin Komunal të Prishtinës, po kontestohet nga pushteti qendror, shkruan gazeta online Reporteri.net.

Ministrisë e Administrimit të Pushtetit Lokal, në një shkresë 2 faqesh në total, e gjysmë faqeje arsyetim, drejtuar Komunës së Prishtinës, po konsideron se ky akt i nxjerrë nga komuna nuk është në përputhje me dispozitat e Legjislacionin në fuqi.

MAPL thotë se kërkesën për këtë rast është dashur ta bëjë Ministria e Arsimit, Shkencës dhe Inovacionit, ndonëse UP-ja nuk është nën vartësinë e Ministrisë e as të Qeverisë, por është institucion i pavarur publik dhe ka organet e veta dhe titullarin e vet.

Në arsyetimin e MAPL-së të cilin e ka siguruar Gazeta Online Reporteri.net, thuhet se “dhënia e pronës së paluajtshme të komunës në shfrytëzim për raste të veçanta, bëhet konform kërkesës me shkrim nga institucionet qendrore të Republikës së Kosovës, si: Presidenti; Kuvendi i Kosovës; Kryeministri/Qeveria; Ministri/Ministria; Kryetari i Këshillit Gjyqësor dhe Kryetari i Këshillit Prokurorial i Kosovës; Kryeshefi i një Agjencie të Pavarura Shtetërore, prandaj duke ju referuar kësaj dispozite kërkesën për Universitetin e Prishtinës duhet duhet ta beje Ministria e Arsimit, Shkencës Teknologjisë dhe Inovacionit”.

MAPL kërkon nga Kuvendi i Komunës dhe Kryetari i Komunës së Prishtinës që të ndërmarrin veprime konkrete që aktin e komunës ta rishqyrtojnë dhe harmonizojnë me dispozitat ligjore në fuqi brenda 30 ditësh.

Kjo e fundit ka kthyer përgjigje negative në këtë kërkesë.

Komuna e konsideron vendim të drejtë dhënien e lejes

Në shkresën tre faqesh të cilën Komuna e Prishtinës ia ka kthyer Ministrisë së Administrimit të Pushtetit Lokal, potencohet se vendimi i datës 24 nëntor 2022 është i drejtë dhe i ligjshëm.

Andaj, Komuna e Prishtinës thotë se nuk do të veprojë sipas kërkesës së MAPL-së, por do të bëjë publikimin e vendimit dhe zbatimin e tij konform kompetencave ligjore, shkruan gazeta online Reporteri.net.

Komuna po ashtu konstaton se MAPL në kërkesën e saj, nuk ka dhënë arsye të mjaftueshme pse Vendimi i Kuvendit Komunal nuk është në përputhje me kushtetutën dhe ligjin përkatës.

Aty po ashtu potencohet se UP nuk është nën vartësinë e Ministrisë e as të Qeverisë, por është institucion i pavarur publik dhe ka organet e veta dhe titullarin e vet.

“Për këto arsye e duke qenë të bindur se Vendimi i Kuvendit Komunal të Prishtinës për ti dhënë në shfrytëzim pronën komunale Universitetit të Prishtinës “Hasan Prishtina” sipas kërkesës se Rektorit të UP si titullar i Universitetit dhe duke u bazuar në dispozitat ligjore të lart cituara, paraqet vendim të drejtë, në interes publik dhe plotësisht të ligjshëm sipas kuptimit të dispozitës se nenit 21 paragrafi 1 të Ligjit nr. 06/L-092 për Dhënien në Shfrytëzim dhe Këmbimin e Pronës së Paluajtshme të Komunës dhe dispozitës së nenit 24 paragrafi 6 nënparagrafi 6.6 të Rregullores (QRK) Nr. 09/2020 për përcaktimin e procedurave të dhënies në shfrytëzim dhe këmbimin e pronës së paluajtshme të komunës”, thuhet në përgjigjen e Komunës.

Prona jepet në shfrytëzim për 99 vjet, projekti financohet nga Bashkimi Evropian   

Kërkesa për shfrytëzimin e pronës komunale është bërë nga Universiteti i Prishtinës “Hasan Prishtina”, gjegjësisht Rektori i UP-së, më 25 dhjetor të këtij viti.

Afati kohor për dhënien në shfrytëzim të pronës së paluajtshme të Komunës, të cekur në këtë vendim, është në afat për 99 vjet.

Prona Komunale do të shfrytëzohet për ndërtimin e objektit të Fakultetit të Shkencave Matematike – Natyrore (FSHMN) dhe Fakultetit Ekonomik, te cilat janë planifikuar të ndërtohen në parcelën kadastrale (Zona Kadastrale Fakulteti Teknik).

Projekti i ndërtimit të objektit e FSHMN-së, financues kryesor i të cilit është Bashkimi Evropian, ndërsa participojnë edhe Universiteti i Prishtinës “Hasan Prishtina” dhe Ministria e Arsimit.

Lidhur me këtë çështje, Gazeta Online Reporteri.net ka dërguar pyetje në adresë të Ministrisë së Administrimit të Pushtetit Lokal, për të pyetur nëse ka tendencë nga niveli qendror për të mos lejuar ndërtimin në këtë pjesë, dhe a po bëhet “ndërhyrje” në pavarësinë institucionale të Universitetit të Prishtinës.

Në përgjigje për Gazetën Online Reporteri.net, MAPL insiston se vendimi është në kundërshtim me ligjin.

“MAPL, ka vlerësuar se vendimi Nr. 01-463/01-257616/22, i datës 24.11.2022, për dhënien në shfrytëzim të pronës së paluajtshëm të komunës Universitetit të Prishtinës “HASAN PRISHTINA”, i miratuar nga Kuvendi i Komunës së Prishtinës, është në kundërshtim më dispozitat e legjislacionit në fuqi.

Në raportin vlerësues të ligjshmërisë së MAPL-së, është konstatuar se vendimi Nr.01-463/01-257616/22, i datës 24.11.2022, është në kundërshtim me nenin 24 paragrafin 6 të Rregullores (QRK) Nr. 09/2020 për përcaktimin e procedurave të dhënies në shfrytëzim dhe këmbimin e pronës së paluajtshme të komunës, ku përcaktohet se dhënia e pronës së paluajtshme të komunës në shfrytëzim për raste të veçanta, bëhet konform kërkesës me shkrim nga institucionet qendrore të Republikës së Kosovës, si: Presidenti; Kuvendi i Kosovës; Kryeministri/Qeveria; Ministri/Ministria; Kryetari i Këshillit Gjyqësor dhe Kryetari i Këshillit Prokurorial i Kosovës; Kryeshefi i një Agjencie të Pavarura Shtetërore. Andaj duke ju referuar kësaj dispozite MAPL, ka rekomanduar që kërkesën për Universitetin e Prishtinës duhet ta bëjë Ministria e Arsimit, Shkencës Teknologjisë dhe Inovacionit”. /Reporteri.net/.