Kryeministri në detyrë, Albin Kurti, ka marrë vendim që të rris shtesat në 350 euro nga 170 sa ishte, për gratë lehona të papunësuara.
Kurti këtë e ka bërë të ditur në mbledhjen e Qeverisë të mbajtur në të enjten, shkruan Insajderi.
“Qeveria e mirë sjell lajme të mira. Po e nisim me lajmin e mirë për të gjitha nënat e reja. Filluam skemën e shtesave për gratë lehona në nivel të pagës minimale gjashtë muaj nga 170 euro për lehonat e papunësuara dhe tre muaj nga 170 euro për lehonat e punësuara mbi pagesën që veçse e marrin sipas Ligjit të Punës”, ka deklaruar ai.
“Meqë tash e kemi pagën minimale të re, është koha të reflektohet edhe në shtesa të lehonat. Sot do të miratojmë rritjen e shtesave nga 170 euro në 350 euro, aq sa është neto vlera e pagës minimale. Kjo përbjen një rritje prej 91,7 për qind”, ka shtuar ai.
Tutje, ai ka bërë të ditur edhe se Qeveria do të mbulojë edhe për 50 për qind të pagës për tre muaj të tjerë në vlerë prej afro 310 euro për lehonat e punësuara. /Insajderi.org/
