Ka përunduar projekti i rinovimit të disa institucioneve shëndetësore dhe sociale në Podujevë. Këto projekte që janë realizuar nga Drejtoria për Shëndetësi dhe Mirëqenie Sociale, përfshijnë dy kontrata, ndërsa vlera totale e dy loteve është 107,501.80 euro.
Drejtoresha për Shëndetësi dhe Mirëqenie Sociale, Adelina Stublla, e cila gjatë ditës i ka vizituar këto objekte, tha se këto investime ndikojnë në përmirësimin e ambientit të brendshëm e të jashtëm të institucioneve shëndetësore e sociale.
Projektet përfshijnë vendosjen e rrethojave të oborrit në AMF-të në Dumnicë, Dobratin, Kërpimeh, Obrançë, rregullimin e oborrit të AMF-së në Bajçinë, rinovimin e brendshëm dhe të jashtëm dhe rregullimin e oborrit të AMF-së në Llapashticë. Pastaj rregullimin e oborrit të QPS-së, rinovimin e repartit të kujdesit paliativ dhe radiologjisë (izolimi, zgjerimi i hapësirave dhe ventilimi), rinovimin e QKMF-së (tualeti për 
personat me afësi të kufizuara, shkallët emergjente dhe dyert e hyrjes të Mjekësisë Familjare, ndarëset e shkallëve, mbjellja e pishave dhe drunjve dekorativë).
