Reshjet intensive të shiut që kanë nisur pasditen e së premtes kanë shkaktuar rritje të ndjeshme të nivelit të lumenjve dhe përroskave në territorin e Komunës së Podujevës, duke ngritur shqetësime për mundësinë e vërshimeve.
Për të vlerësuar situatën dhe për të marrë masat e nevojshme, në terren kanë dalë drejtori i Shërbimeve Publike, Mbrojtje dhe Shpëtim, Bahri Selimi, dhe drejtori i Inspeksionit, Shuajb Blakçori.
Sipas drejtorit Selimi, në fshatin Pakashticë është vërejtur rritje e nivelit të lumit, por deri më tani situata mbetet nën kontroll. Ai theksoi se ekipet komunale do të monitorojnë nga afër zhvillimet në terren dhe do të ndërhyjnë me kohë në rast nevoje.
Komuna bën thirrje për kujdes të shtuar, veçanërisht në zonat afër lumenjve dhe përroskave, dhe garanton se do të ndërmarrë çdo hap të nevojshëm për të siguruar sigurinë e qytetarëve dhe pronave të tyre.
