Radio Televizioni i Kosovës ka vendosur ta cenzurojë protestën e aktivistit në edicionin qendror të lajmeve, i cili u shfaq para ekranit me një pankartë ku shkruhej “RTK – Radio Televizioni i Kurtit”.
Në videon e edicionit të lajmeve të së mërkurës, që RTK e ka shpërndarë në kanalin Youtube, është prerë momenti kur aktivisti hyn me pankartë në studion televizive, veprim ky skandaloz nga ana e transmetuesit publik, shkruan Gazeta Online Reporteri.net.
Videoja vazhdon prej momentit kur Alketa Gashi Fazliu, e cila qëlloi të jetë rastësisht moderatore e lajmeve për sonte, kërkon falje “në mënyrë profesionale dhe personale” për këtë ndërhyrje.
“Ju kërkoj ndjesë për ato skena që patë pak më përpara kur në mënyrë të paorganizuar dhe të panjohur si nga ana e stafit, si nga ana e redaksisë, persona të panjohur hyn brenda përbrenda televizionit publik dhe bënë atë që ju patët mundësi ta shihni pak më përpara”, dëgjohet duke thënë moderatorja.
Një aktivist i PSD’së ka zhvilluar një aksion simbolik në studio të RTK’së si shenjë proteste ndaj përzgjedhjes së militantit të Vetëvendosjes, drejtor i kanaleve të gjuhës shqipe në televizionin publik të Kosovës.
Gjatë transmetimit live të lajmeve qendrore, aktivisti ka hyrë në studio të RTK’së, duke e mbajtur një pankartë në duar ku shkruhej “RTK – Radio Televizioni i Kurtit”.
Kujojmë se Rilind Gërvalla, që është përzgjedhur në pozitën e drejtorit, është militant i kahmotshëm i partisë në pushtet. /Reporteri.net/.
