Radio Televizioni i Kosovës ka lidhur kontratë me kompaninë nga Tirana, DigitAlb për transmetimin e ndeshjeve të kombëtarëve të UEFA, FIFA World Cup dhe miqësoreve të Kosovës.
Kontrata, e cila është lidhur përmes procedurës së negociuar, peshon 750 mijë euro, raporton Paparaci.
Me këtë kontratë, RTK-ja ka blerë të drejtat e ritransmetimit në Kosovë të ndeshjeve të kombëtarëve të cilat organizohen nga UEFA, përfshirë Kampionatin Evropian, ndeshjet e Kupës së Botës, si dhe miqësoret e Përfaqësueses së Kosovës.
“Blerja e të drejtave për ndeshjet e UEFA,FIFA World Cup, miqësoret e Kosovës 2024 2026”, thuhet në përshkrimin e kontratës.
Më saktësisht, sipas Dosjes së Tenderit, Digitalb përmes kësaj kontrate ia nënliçencon RTK-së të drejtat e transmetimit të ndeshjeve të Kampionatit Evropian, UEFA Nations League 2024, Kualifikimet për Kupën e Botës, si dhe ndeshjet miqësore të Kosovës deri më 2026.
Në shkurt të këtij viti, edhe Telekomi i Kosovës – një ndërmarrje publike – lidhi marrëveshje me DigitAlb për transmetimin e programeve të saj televizive.
Sipas kontratës, e cila parashihet të shkojë deri në 1.3 milion euro, Telekomi i Kosovës do të paguajë në baza mujore faturën që gjenerohet nga abonimet në treg.
