Presidenti i Shteteve të Bashkuara të Amerikës, Joe Biden, ka thënë se ShBA dhe partnerët e saj perëndimorë, këtë javë, pritet t’i vendosen sanksione të tjera Rusisë, tash që po hymë në një vit prej kur ka filluar pushtimi i paprovokuar rus.
Në një adresim publik nga kryeqyteti i Polonisë, Varshava, Biden tha se këto sanksione do të sigurojnë që të japin llogari kushdo që fshihet pas këtij sulmi, raporton Sky News, transmeton Gazeta Online Reporteri.net.
Presidenti amerikan, i cili dje ishte në vizitë historike në Ukrainë për herë të parë që kur filloi lufta, gjithashtu shtoi se, vitin e ardhshëm, do të presë “çdo anëtar të NATO-s” në një samit në SHBA.
Sipas Biden, angazhimi i Amerikës ndaj aleancës ushtarake perëndimore është “i fortë”.
“Një sulm kundër njërit është një sulm kundër të gjithëve,” deklaroi ai.
Kujtojmë se 24 shkurti i këtij viti shënon një-vjetorin e fillimit të pushtimit rus në Ukrainë. /Reporteri.net/.
