ADVERTISEMENT
Me organizim nga Komuna e Podujevës në bashkëpunim me shoqatat e dala nga lufta e UÇK-së dega në Podujevë u shënua 25 vjetori i Betejës së Llapashticës.
Aktivitetet filluan nga “Kompleksi Memorial i Dëshmorëve” në Penuhë, ku u bënë homazhe pranë varrezave të dëshmorëve, në të cilat morën pjesë; Ministri i Mbrojtjes, Ejup Maqedonci, deputetë, kryesuesi i Kuvendit Komunal, Hilmi Hoxha, drejtorë komunal, komandantë të ZOLL-it, veteranë të luftës, familje të dëshmorëve dhe qytetarë, pas homazheve në Penuhë delegacioni vazhdoi për homazhe tek lagjja e Kastratëve në Obrançë dhe më pas tek Tabet e Llapashticës aty ku u mbajt manifestimi përkujtimor për Betejën e Llapashticës.
Në shënim të kësaj dite u mbajt edhe aksioni vullnetar për dhurimin e gjakut, e organizuar nga Komuna e Podujevës në bashkëpunim me Qendrën Kombëtare të Transfuzionit të Gjakut.
Në fjalën para të pranishmëve në manifestimin përkujtimor fjalë rasti në emër të institucionit të komunës e mbajti, Bahri Selimi i cili tha; “Beteja e Llapashticës zë vend shumë të rëndësishëm në kalendarin e ngjarjeve historike të rezistencës së armatosur të UÇK-së. Idealet për të cilat ranë dëshmorët: Isa Havolli, Ismet Dërguti, Skender Zejnullahu, Miftar Zenjullahu, Lulzim Jashari, Bajram Murati, Avni Selmani, Fatmir Selmani, Remzi Demolli dhe Jetullah Kastrati janë udhërrëfim për ne të gjallët se si duhet atdheu e se si sakrifikohet për liri. Luftëtarët e kësaj beteje dëshmuan se fati i Kosovës ishte më i rëndësishëm se fati individual i secilit nga ta.”
Fjalë rasti në manifestimin përkujtimor për betejën e Llapashticës mbajtën edhe Ministri i Mbrojtjes, Ejup Maqedonci, komandanti i ZOLL-it, Rrustem Mustafa dhe përfaqësuesi i shoqatave të dala nga lufta dega në Podujevë, Xhemshit Gashi.
Pas fjalimeve ishte përgatitur edhe programi artistik ku u recitua një poezi dedikuar dëshmorëve të rënë në këtë betejë, u këndua një këngë nga Muhamet Ahmeti dhe një valle nga të vegjlit nga “Flaka e Llapit”.
