Një tjetër shpërthim që dyshohet të jetë kryer me shok-bombë ka ndodhur sot në lagjen ‘Kroi i Vitakut’ në Mitrovicë të Veriut, raporton Gazeta Sinjali.
Sipas Policisë së Kosovës, njësitë relevante kanë dalë në vendin e ngjarjes, teksa nuk raportohet për persona të lënduar apo dëme materiale.
“Njësitet relevante policore kanë dalë në atë lokacion, nga ku dyshohet se është dëgjuar shpërthimi, i cili dyshohet të jetë shkaktuar nga ndonjë mjet shpërthyes (shok bombë) por që deri më tani nuk është raportuar për ndonjë lëndim apo dëmtim”, thuhet në përgjigjen e policisë.
Ndryshe, situata e sigurisë në veriun e Kosovës, të banuar me shumicë serbe, është tensionuar ditëve të fundit, pasi që nga 6 dhjetori janë regjistruar disa incidente me armë zjarri, granata dore dhe shok bomba.
Më 10 dhjetor, disa serbë lokalë ngrenë barrikada, duke bllokuar rrugët që çojnë në dy pikëkalimet kufitare të lidhin Kosovën dhe Serbinë, Jarinjë dhe Bërnjak. Barrikadat u vendosën në shenjë pakënaqësie me arrestimin e një ish-polici serb të Kosovës, që Kosova thotë se dyshohet për “sulmin terrorist” ndaj zyrave të Komisionit Qendror të Zgjedhjeve në veri.
Më 15 dhjetor, Serbia i është drejtuar KFOR-it me kërkesën për dislokimin e deri 1.000 trupave ushtarake dhe policore serbe në Kosovë. Beogradi ka thënë se kërkesa është bërë në bazë të Rezolutës 1244.
Misioni paqeruajtës i NATO-s në Kosovë, KFOR, gjatë javës së shkuar ka dërguar trupa shtesë dhe patrulla në veri të Kosovës për të monitoruar nga afër situatën e cila javëve të fundit ka qenë e tensionuar.
