Presidentja e Kosovës, Vjosa Osmani ka treguar se është marrë vendim për shtyrje të zgjedhjeve. Ajo ka thënë se zgjedhjet do të mbahen në muajin prill.
Osmani tha se data e saktë e zgjedhjeve do të bëhet e ditur sot ose nesër, pasi të ketë edhe një konsultim me organet e sigurisë.
“Diskutuam rreth datës më të përshtatshme dhe me konsensus të plotë, erdhëm në konkludim që të shtyhen për në muajin prill, data e saktë do të bëhet e ditur sot ose nesër. Kishim dakordancë të plotë për muajin prill 2023. Të gjithë përfaqësuesit e partive politike treguan përgjegjshmëri të lartë në raport me jetën e qytetarëve, e cila duhet të sigurohet e mbrohet me çdo kusht, përkundur faktit që Policia e Kosovës ka kapacitete të mjaftueshme, aktivitetet e bandave kriminale në veri kanë arritur të frikësojnë qytetarët që të mos ndihen të lirë që të marrin pjesë në zgjedhje prandaj edhe pjesëmarrja do të ishte jashtëzakonisht e ulët për shkak të frikës nga tensionet dhe sulmet. Në mënyrë që të sigurojmë pjesëmarrje sa më të madhe, siguri për qytetarët dhe vëzhgim nga organizatat vendore e ndërkombëtare e morëm këtë vendim.”, tha Osmani ndër të tjera.
