Si të matni saktë presionin e gjakut, por edhe çfarë tregojnë vlerat në pajisje.
Ndër sëmundjet kronike më të zakonshme në botë është hipertensioni, i njohur më mirë si presioni i lartë i gjakut. Quhet edhe “vrasësi i heshtur” pikërisht sepse ndikon në shëndetin pa shumë simptoma dhe shumë njerëz as që e dinë se e kanë.
Simptomat më të zakonshme që tregojnë presionin e lartë të gjakut janë dhimbja e kokës, lodhja, përgjumja dhe mungesa e energjisë. Këto simptoma janë të zakonshme jo vetëm te hipertensioni, por veçanërisht te gratë që e lidhin atë me ndryshimet hormonale, transmeton Telegrafi.
E pra, kur duhet të fillojmë të matim presionin e gjakut?
Sa herë që nuk ndihemi mirë, ne duhet të matim presionin e gjakut. Për të përcaktuar presionin e gjakut të dikujt që është i vlefshëm, personi duhet të jetë i qetë.
Presioni matet 15 minuta pas aktivitetit fizik në pozicionin ulur. Mund të ndodhë që presioni i gjakut në krahun e majtë dhe të djathtë të jetë i ndryshëm, thonë kardiologët.
Si fillim duhet të jemi të ulur, me shpinë të mbështetur, të përveshim mëngët dhe të qetësojmë krahun në tavolinë. Mesi i rripit të aparatit duhet të jetë në lartësinë e zemrës. Shputat e këmbës duhet të pushojnë në dysheme dhe nuk duhet të kryqëzohen këmbët dhe as të flitet gjatë matjes.
Gjithashtu, ka njerëz që matin shpesh tensionin e gjakut, por edhe nga ata që kanë frikë nga matja, si fëmijët dhe adoleshentët. Ata e shohin si stresuese këtë kontroll rutine të presionit të gjakut. Për këtë arsye, mjekët rekomandojnë që këta persona të masin tri herë tensionin e gjakut dhe të “marrin” vlerën e tretë.
Poashtu, mund të themi se pajisjet moderne digjitale janë shumë të besueshme.
Kur duhet bërë matja e presionit të gjakut?
▪ Para se të merrni mjekimet për presionin e gjakut.
▪ Të paktën dy orë pas ngrënies.
▪ Pas zbrazjes së fshikëzës dhe zorrëve.
▪ Një orë pas konsumit të kafes apo pirjes së duhanit.
▪ Tridhjetë minuta pas stërvitjes.
▪ Gjithmonë pasi të jeni qetësuar dhe të keni minimalisht 5 minuta pa folur.
Këto janë vlerat e presionit të gjakut:
▪ 120/80: presioni optimal i gjakut
▪ Nga 120/80 deri në 129/84: presion normal i gjakut
▪ Nga 130/85 deri në 139/89: parahipertension
▪ Nga 140/90 deri në 159/99: hipertension i shkallës së parë
▪ Nga 160/100 deri në 179/109: hipertension i shkallës së dytë
▪ Nga 180/110: krizë hipertensioni
