Ragip Xhaka, babai i Granitit dhe Taulantit është zyrtarizuar si kandidat për deputet në listën e PDK-së për zgjedhjet e 9 shkurtit. Sporti dhe mërgata janë dy fokuset kryesore të Ragip Xhakës në angazhimin e tij si deputet i mundshëm.
“Me nderim dhe përgjegjësi të madhe, zyrtarizoj kandidaturën time për deputet në Kuvendin e Republikës së Kosovës, me numrin 34 në listën e Partisë Demokratike të Kosovës. Vendimi im për t’u bërë pjesë e kësaj gare buron nga dëshira ime e madhe për të kontribuar me përkushtim dhe përgjegjësi për Kosovën, mërgatën dhe çdo qytetar të këtij vendi që meriton përfaqësim dinjitoz dhe zgjidhje për problemet e tij.
Si një baba krenar i dy sportistëve të njohur ndërkombëtarisht, Granit dhe Taulant Xhaka, e njoh fuqinë e sportit si një urë lidhëse mes njerëzve, si një mjet për të promovuar vlerat dhe identitetin tonë kombëtar, dhe si një fushë që kërkon më shumë përkrahje institucionale. Sporti do të jetë një nga prioritetet e mia, duke u angazhuar për investime më të mëdha në infrastrukturën sportive dhe për krijimin e mundësive për të rinjtë e talentuar, që ata të zhvillojnë potencialin e tyre brenda Kosovës.
Një tjetër shtyllë e rëndësishme e angazhimit tim është mërgata jonë. Si dikush që ka jetuar jashtë vendit, e di sfidat, sakrificat dhe potencialin që kanë bashkatdhetarët tanë. Angazhimi im do të jetë për fuqizimin e lidhjeve mes Kosovës dhe mërgatës, krijimin e kushteve që ata të investojnë dhe të kontribuojnë në zhvillimin e vendit, si dhe garantimin e të drejtave të tyre politike dhe ekonomike.
Kosova meriton më shumë, dhe jam i gatshëm të jap të gjithë energjinë time për një të ardhme më të ndritur për secilin prej jush. Ju ftoj që më 9 shkurt të më përkrahni me numrin 34, duke votuar për një zë që do të përfaqësojë me dinjitet interesat e Kosovës dhe të çdo qytetari të saj” shkruan Ragip Xhaka në njoftim.
