Sindikata e Policisë së Kosovës shpreh shqetësimin e thellë lidhur me sulmin fizik ndaj dy zyrtarëve policorë në Drobesh të Vitisë dhe u bën thirrje organeve të drejtësisë të tregohen të pa kompromis ndaj atyre që sulmojnë zyrtarët e rendit.
“Dhuna ndaj pjesëtarëve të policisë është e papranueshme dhe kërkon ndëshkim të menjëhershëm”, thuhet në reagim.
Sindikata e Policisë së Kosovës apelon te të gjithë qytetarët që të mos ushtrojnë rezistencë ndaj urdhrave ligjorë të zyrtarëve policorë, pasi një gjë e tillë përbën vepër penale.
“Policia e Kosovës është mburoja e qytetarëve tanë dhe garantuese e rendit kushtetues, prandaj meriton respekt dhe mbështetje të vazhdueshme.”
Dy zyrtarë policorë mbrëmë në orën 20:00 janë sulmuar fizikisht gjatë tentimit për arrestimin e tre personave.
Policët e sulmuar kanë pranuar tretman mjekësor, ndërsa dy të dyshuarit janë arrestuar. Personi i tretë i dyshuar gjendet në arrati.
Me vendim të prokurorit pas intervistimit njëri nga të dyshuarit është dërguar në mbajtje, ndërsa tjetri është liruar në procedurë të rregullt.
