Nuk janë të rralla rastet kur zyrtarët policorë ballafaqohen me kërcënime serioze nga qytetarë në qytete të ndryshme të Kosovës. Shpeshherë kërcënimet verbale eskalojnë edhe në sulme fizike ndaj tyre, duke ua vështirësuar punën e madje duke ua kërcënuar edhe jetën, raporton Gazeta Sinjali.
Një rast i tillë ka ndodhur të hënën mbrëma në lagjen Dardania në Prishtinë, ku 3 persona kanë sulmuar dhe penguar zyrtarët policorë, që kishin shkuar për të intervenuar në një lokal ku ndodheshin të dyshuarit.
Siç mëson Sinjali, Policia fillimisht kishte marrë informacionin se në lokalin AM-Bar ka pasur zhurmë të madhe në orët e vonë, duke prishur kështu rendin dhe qetësinë publike. Posa zyrtarët policorë kanë arritur në vendin e ngjarjes, janë përballur në rezistencë nga tre të dyshuarit.
Fillimisht, i dyshuari kryesor i ka sulmuar fizikisht dy policë, që i bëri ata ta vënë nën kontroll duke e arrestuar të njëjtin. Por, zyrtarët policorë u ballafaquan me miqtë e të dyshuarit, të cilët i penguan për ta shoqëruar shokun e tyre për në stacion policor.
Pavarësisht pengesave, Policia i ka dërguar në stacion tre të dyshuarit, ku janë intervistuar dhe më pas ndaj tyre kanë nisur hetimet me urdhër të Prokurorit të Shtetit.
I riu që dyshohet për sulm është dërguar në mbajtje për 48 orë, ndërsa ndaj dy të dyshuarve të tjerë kanë nisur hetimet për veprën penale “Pengim i personit zyrtar në kryerjen e detyrave zyrtare”.
