Nga sot ka nisur hyrja e mallrave serbe në Kosovë, një ditë pasi Qeveria ndryshoi masën nga “ndalimi” në “kontroll të shtuar”.
Të paktën kjo ka filluar nga pika e kalimit kufitar në Merdar, ku nga faza e qarkullimit të kufizuar të mallrave, tashmë ka kaluar në fazën e qarkullimit të mallrave me kontrolle manuale të sigurisë, transmeton Zeri.info.
Ministri i Brendshëm, Xhelal Sveçla, ka njoftuar sot në lidhje me vendimin e ri, ndërsa tha se kjo masë do të bëhet vetëm në pikën e kalimit kufitar në Merdar, kurse pikat e tjera me Serbinë do të hapen për të gjitha mallrat në momentin kur skanerët me rreze X bëhen funksionalë në ato pika kufitare.
“Pikat e tjera kufitare me Serbinë do të hapen për të gjitha mallrat në momentin kur skanerët me rreze X bëhen funksionalë në ato pika kufitare. Transportuesit e mallrave gjatë kësaj periudhe duhet të kenë parasysh këtë ndryshim dhe të bëjnë planifikimin e duhur të kohës së nevojshme për procedurat e reja të kalimit të pikës kufitare”, shkroi Sveçla.
Kujtojmë se ky vendim erdhi pas presionit të Gjermanisë, e cila kërcënoi Kosovën me përjashtim nga Procesi i Berlinit dhe CEFTA. /Zëri
