Për rastin skandaloz të dhunës ndaj një të moshuare në një shtëpi të ashtuquajtur “kujdesi” për pleq, ka reaguar edhe Ministri i Punëve të Brendshme, Xhelal Sveçla, i cili bëri thirrje për sjelljen para drejtësisë të të gjithë personave të përfshirë në këtë akt çnjerëzor.
Të papranueshme i quajti Sveçla të gjitha veprimet e tille të dhunës kudo që ata ndodhin, e në veçanti brenda institucioneve të cilat konsiderohet të ofrojnë ndihmë përkujdesi.
“Me shqetësim kemi parë të gjithë pamjet e keqtrajtimit të një gruaje të moshuar nga një grup vajzash, në një shtëpi të përkujdesjes së të moshuarve në Pejë”.
“Veprime të tilla të dhunës janë të papranueshme kudo që ndodhin, por në veçanti janë më të rënda kur ndodhin brenda institucioneve që konsiderohen të ofrojnë ndihmë dhe përkujdesje”, shkroi mes tjerash ai.
“Nga Policia e Kosovës jam njoftuar që deri më tani janë arrestuar dy nga dhunueset dhe hetimet po vazhdojnë. Fuqishëm bëj thirrje për sjelljen para drejtësisë të të gjithë personave të implikuar në këtë akt çnjerëzor”, përfundoi ministri.
