Shefi i Grupit Parlamentar të Aleancës për Ardhmërinë e Kosovës, Besnik Tahiri, ka thënë se ky subjekt politik nuk e mbështet vendimin për rritjen e pagave për sektorin publik. Ai e ka vlerësuar këtë vendim të qeverisë si “skandaloz” dhe sipas tij, në përmbajtje është mashtrim.
“Të gjithë ne kemi pritur që të duartrokasim për rritjen e vlerës së koeficientit, e në esencë kjo është skandaloze, në përmbajtje është mashtrim dhe dështim”, ka theksuar Tahiri në një konferencë për media.
Tutje ai ka thënë se procesi i rritjes së pagës në sektorin publik bëhet në dy mënyra, përmes Ligjit që i rregullon pagat, derisa shumën e rregullon me Ligjin mbi Buxhetin.
“Rritja e njësive në formë hierarkike të koeficientit mund të ndodhë vetëm nëse ky ligj i shtrohet një procesi të amendamentimit në Qeveri e më pastaj në Kuvend. Është manipulim me shërbyes civil, të cilët kanë pritur që vlera e koeficientit të jetë së paku 130 euro”, u shpreh Tahiri.
Rritjen e paralajmëruar nga Qeveria e ka vlerësuar të kundërligjshme. “Ne kërkojmë që të shkohet përmes Ligjit për Buxhetin. Ne nuk e mbështesim rritjen prej 50 euro. Ky është mashtrim dhe tentim për blerje të votës”, ka shtuar Tahiri.
