Partia Demokratike e Kosovës, në një konferencë për media, ka kërkuar shkarkimin e drejtorit të KEK-ut, Nagip Krasniqit, i cili po mbahet në Qendrën e Paraburgimit, si i dyshuar për keqpërdorim të pozitës së tij.
Shefi i Grupit Parlamentar të PDK-së, Abelard Tahiri, ka thënë se Krasniqi nga Qendra e Paraburgimit është duke e drejtuar KEK-un.
Ai e ka kritikuar gjuhën e përdorur nga kryeministri i Kosovës, Albin Kurti, i cili sipas tij duhet ta shkarkojë drejtorin e KEK-ut dhe jo ta mbrojë atë.
“E konsiderojmë të papranueshëm dhe të ashpër, reagimin e kryeministrit në lidhje me arrestimin e drejtorit të KEK-ut. Ai e mban ende pozitën e drejtorit të KEK-ut, tashmë është në paraburgim, ai nga paraburgimi e drejton korporatën më të rëndësishme energjetike në vend, është e dëmshme. Ajo që duhej të ndodhte, është që ky person të shkarkohet, bordi të shkarkohet, të merren masa edhe ndaj akterëve tjerë, për keqpërdorimet që kanë ndodhur”, ka thënë ai.
Tahiri ka thënë se PDK-ja, është duke përgatitur kallëzime penale në Prokurorinë Speciale, në lidhje me keqpërdorimet në sektorin e energjisë.
“Në komisionet hetimore, kanë dalë abuzime që jemi duke i procedu si kallëzime penale në prokurorinë speciale. Për ne është e papranueshme që drejtori, vazhdon të jetë në paraburgim dhe në krye te KEK-ut”, ka thënë ai.
Tutje Tahiri, ka bërë të ditur se do ta ftojnë kryeministrin Kurti, dhe ministren e Ekonomisë, Artane Rizvanolli, për t’i informuar opozitën dhe qytetarët në lidhje me keqpërdorimet në KEK.
