Shtetasi turk, M.G., i cili dyshohet për vrasjen e vajzës së tij, Sh.G., si dhe për tentimvrasjen e vajzës tjetër, A.G., dhe të bashkëshortes, R.G., sipas dosjes së Prokurorisë Themelore të Prizrenit, aktet në fjalë i ka kryer me dashje, teksa vajzat e tij ishin ende në gjumë.
Në bazë të dhënave që figurojnë në kërkesën për caktimin e masës së paraburgimit, të dorëzuar në Gjykatën Themelore të Prizrenit nga ana e Departamentit për Krime të Rënda të Prokurorisë Themelore të Prizrenit, ngjarja ka ndodhur më datë 6 maj 2025, rreth orës 05:30 të mëngjesit, në rrugën “Shote Galica” në Prizren, ku i dyshuari, pas faljes së namazit të sabahut, ka hyrë në dhomën ku po flinin vajzat e tij, Sh.G. (14 vjeç e 11 muaj) dhe A.G. (10 vjeç), dhe ka kryer një akt të rëndë dhune me pasoja fatale. Ai dyshohet se ka sulmuar me thikë bajonet vajzën e madhe, Sh.G., duke e goditur disa herë në qafë, si pasojë e së cilës ajo ka ndërruar jetë në vendin e ngjarjes.
“Më datë 06.05.2025, rreth orës 05:30, pikërisht në rr. ‘Shote Galica’ në Prizren, me dashje privon nga jeta fëmijën, anëtarin e familjes Sh.G., të cilën e ka vajzë dhe jetonin në një shtëpi të përbashkët, duke vënë me dashje në rrezik jetën edhe të personave të tjerë, në atë mënyrë që atë ditë, posa e fal namazin e sabahut, hyn në dhomën ku ishin vajzat e tij, Sh.G. dhe A.G., të cilat ishin ende në gjumë; merr thikën e llojit bajonet me gjatësi tehu rreth 23 cm, me të cilën fillimisht sulmon vajzën e mitur (14 vjeç e 11 muaj), tashmë të ndjerën Sh.G., duke e goditur disa herë në pjesën e qafës (fytit), me ç’rast e njëjta ndërron jetë në vendin e ngjarjes. Me këto veprime ka kryer veprën penale: ‘Vrasje e rëndë’…”, thuhet në kërkesën e Prokurorisë, raporton Telegrafi.
Tutje, theksohet se pas këtij akti, M.G. dyshohet se ka vazhduar sulmin duke e goditur me të njëjtën thikë vajzën tjetër, A.G., e cila ka pësuar lëndime të rënda trupore. Më pas, ai ka sulmuar edhe bashkëshorten e tij, R.G., duke e goditur në fytyrë dhe duar.
“Pas vrasjes, tanimë të ndjerës Sh.G., me dashje tenton t’i privojë nga jeta viktimat e njëjshme – të dëmtuarën, fëmijën-vajzën A.G., dhe bashkëshorten R.G., me të cilat jetonte në shtëpi të përbashkët – duke vënë me dashje në rrezik jetën edhe të personave të tjerë, në atë mënyrë që, posa e fal namazin e sabahut, hyn në dhomën ku ishin vajzat e tij, Sh. dhe A.G., e të cilat ishin ende në gjumë; merr thikën e llojit bajonet me gjatësi tehu rreth 23 cm, me të cilën fillimisht e sulmon vajzën e madhe, tashmë të ndjerën Sh.G. (14 vjeç e 11 muaj), duke e goditur disa herë në pjesën e qafës (fytit), me ç’rast e njëjta ndërron jetë në vend; më pas, me të njëjtën thikë e godet në pjesën e qafës të dëmtuarën A.G. (10-vjeçare), të cilës i shkakton lëndime të rënda trupore; dhe më pas, po me të njëjtën thikë, e godet edhe bashkëshorten e tij, R.G., në pjesën e fytyrës dhe të duarve, duke i thënë fjalët: ‘Vajzat tona duhet të vdesin dhe të gjithë duhet të shkojmë në xhenet. Unë do të mbys edhe ty e pastaj edhe veten.’ Me këtë ka kryer veprën penale: ‘Vrasje e rëndë e ngelur në tentativë’…”, thuhet në kërkesën e Prokurorisë, raporton Telegrafi.
Në të njëjtën shkresë përshkruhet se M.G. dyshohet se ka pasur në posedim, në mënyrë të kundërligjshme, armën – thikën bajonet me teh të mprehtë 23 cm – të cilën e ka përdorur për kryerjen e dy veprave penale të sipërpërmendura.
“Me këtë ka kryer veprën penale: ‘Mbajtja në pronësi, kontroll ose posedim të paautorizuar të armëve’, nga neni 366, paragrafi 1 i KP-së”, thuhet në kërkesën e Prokurorisë.
Gjykata Themelore në Prizren, të mërkurën, ka caktuar masën e paraburgimit prej 30 ditësh ndaj të pandehurit M.G., i dyshuar për vrasjen e vajzës së tij, si dhe tentimvrasjen e vajzës tjetër dhe të bashkëshortes.
Në njoftimin e kësaj gjykate thuhet se Departamenti i Krimeve të Rënda, me gjyqtaren e procedurës, Shpresa Emra, ka caktuar masën e paraburgimit, në kohëzgjatje prej një muaji, për të pandehurin M.G. (shtetas turk), për shkak të dyshimit të bazuar se ka kryer veprat penale: “Vrasja e rëndë”, “Vrasja e rëndë e ngelur në tentativë”, dhe “Mbajtja në pronësi, kontroll ose posedim të paautorizuar të armëve”, sipas Kodit Penal të Republikës së Kosovës.
“Me rastin e caktimit të paraburgimit, Gjykata ka marrë parasysh peshën e rëndë të veprave penale, mënyrën dhe rrethanat në të cilat dyshohet se janë kryer veprat penale brenda ambientit familjar, dhe vendosmërinë e të pandehurit për t’i kryer ato. Në këtë fazë, caktimi i paraburgimit është i domosdoshëm dhe i arsyeshëm”, thuhet në njoftimin e Gjykatës. /Telegrafi/
