Gjuajtjet me armë zjarri janë bërë të shpeshta në vendin tonë, duke cenuar kështu sigurinë e qytetarëve të cilët ka raste kur mund t’u rrezikohet jeta si pasojë e plumbave qorr, raporton Gazeta Sinjali.
Të shtëna me armë janë dëgjuar edhe mbrëmë pak para mesnatës në rrugën ‘Fahri Fazliu’ në Prishtinë, por kësaj radhe si cak ishte një veturë e cila ishte në lëvizje.
Sinjali mëson se shoferi që drejtonte veturën ka shpëtuar pa lëndime dhe i njëjti menjëherë ka njoftuar Policinë për atë që ka ndodhur.
Njësitë policore kanë dalë në vendin e ngjarjes ku kanë kryer ekzaminimet në veturën që u godit nga katër predha e po ashtu janë gjetur dhe sekuestruar pesë gëzhoja të armës që dyshohet se u përdor në rast.
22-vjeçari nuk ka arritur që t’i identifikojë të dyshuarit dhe sipas dëshmisë së tij gjithçka ka ndodhur derisa ai ishte në veturën e tij dhe në një moment katër plumba kanë goditur derën e veturës kah ana e tij.
Me urdhër të prokurorit, rasti është cilësuar ‘Vrasje në tentativë’, ndërsa veprimet tjera ligjore do merren posa të identifikohen të dyshuarit
