Gazeta prestigjioze britanike The Guardian ka shkruar një editorial për Ballkanin Perëndimor ku kritikon qasjen e Bashkimit Evropian në këtë rajon, duke i mundësuar Kremlinit zyrtar shtrirjen e agjendës së vet.
Guardian ka bërë një analizë të gjashtë shteteve që përbëjnë këtë hapësirë gjeo-politike, por me theks të veçantë problemit mes Kosovës dhe Serbisë.
“Raportet në mes të Prishtinës dhe Beogradit – që gëzojnë entuzizmin e Kremlinit – duken më keq se asnjëherë tjetër në këto 20 vitet e fundit”, shkruan bordi editorial i Guardian.
“Kapaciteti i BE-së për të ndërmjetësuar është i komplikuar meqë Serbia varet nga gazi rus dhe gjithashtu refuzon t’i vë sanksione Moskës. Por, nëse Marrëveshja e Brukselit e vitit 2013 nuk zbatohet përfundimisht këtë vit – që nënkupton autonomi politike për serbët e Kosovës që çon në normalizim të raporteve në mes të dy vendeve – rreziku i një konflikti të menjëhershëm është real”, shkruan Guardian.
“Po ndodhi kjo, po nuk u implementua kjo marrëveshje, dhe po pati konflikt, pasojat do të ishin serioze.
Duke pasur parasysh implikimet gjeo-politike, dhe influencën në rritje të Kinës në këtë rajon, BE-ja duhet ta përmirësojë lojën e vetë menjëherë, thotë shkrimi i gazetës.
“Suksesi i partive anti-emigrim dhe islamofobe në disa shtete të Evropës si Franca e Holanda, nënkupton se zgjerimi drejt lindjes është jo real në të ardhmen e afërt. Në Serbi madje, mbështetja për anëtarësim ka rënë nën 50 për qind, derisa Beogradi refuzon të bëhet pjesë e sanksioneve evropiane për Rusinë”.
Sipas Guardian, BE-ja akoma ka gjasa ta rrisë influencën dhe ta bëjë gjënë e duhur duke rikthyer vitet e humbura nga neglizhenca.
“BE duhet të ofrojë shumë më shumë në terma të ndryshimit të lojës përmes asistencave më të madha ekonomike dhe qasjes në tregun e BE-së. Në shkëmbim për progres në çështje si korrupsioni, rendi dhe ligji dhe liria e shprehjes, një qasje me përfshirje konkrete mund të gjenerojë vullnetin e mirë të nevojshëm për të ulur tensionet në rajon dhe për të rritur vlerat demokratike”, thuhet në editorialin e Guardian.
Sipas gazetës, alternativa tjetër, e papëlqyeshme, është lejimi i një rajoni jetik strategjik që të shikojë nga lindja po aq sa perëndimi, duke fuqizuar forcat joliberale etno-nacionaliste dhe duke avancuar agjendën e Kremlinit në oborrin e pasmë të Evropës.
