Një rast i vjedhjes së rëndë është raportuar mbrëmjen e sotme në rrugën “Shpëtim Robaj” në kryeqytet, ku persona të panjohur kanë thyer një veturë të tipit VW Touran me targa 01-616-MM dhe kanë marrë sende me vlerë materiale dhe personale.
Sipas burimeve të Sinjalit, ankuesja (emër i njohur për redaksinë) ka deklaruar para Policisë se e kishte parkuar veturën rreth orës 17:30, ndërsa rreth orës 19:00 është njoftuar për dëmtimin e saj.
Kur është kthyer, ka vërejtur se xhami i pasëm në anën e djathtë ishte i thyer.
Nga vetura, të dyshuarit kanë marrë një çantë ku ndodheshin: rreth 200 euro para të gatshme, Letërnjoftimi, patenta e shoferit dhe kartela bankare, e shënime me rëndësi.
Po ashtu, sipas ankueses të dyshuarit kanë marrë edhe sende tjera me vlerë.
Hetimet janë duke vazhduar, ndërsa autorët mbeten ende të paidentifikuar.
