Rastet e grabitjeve e të vjedhjeve po vazhdojnë të rriten, ndërkohë që siguria për të lëvizur edhe në hapësirat publike po rrezikohet. Ndër rastet e shpeshta të grabitjeve janë gjësendet me vlerë, si stolitë e arit, telefonat e çantat e krahut që hajnat arrijnë t’i kapin nga qytetarët nëpër rrugë, raporton Gazeta Sinjali.
Një rast i tillë ka ndodhur mbrëmë pas mesnate te Parku i Qytetit në Prishtinë, ku tre persona ende të paidentifikuar dyshohet se kanë plaçkitur një person.
Burimet e Gazetës Sinjali kanë zbardhur detaje nga rasti me të cilin u përball 24-vjeçari, ku të dyshuarit me anë të përdorimit të forcës dyshohet se ia vodhën nga zinxhirin e arit që e mbante në qafë, kuletën dhe telefonin mobil.
Bazuar në dëshminë e viktimës, vlera e zinxhirit kap vlerën e rreth 6 mijë eurove, ndërsa telefoni bën rreth 1 mijë euro. I njëjti ka marrë edhe ndihmë mjekësore në spital, si pasojë e lëndimeve që mori.
Ndërkohë njësitë policore kanë dalë në vendin e ngjarjes ku kanë kryer ekzaminimet e nevojshme që ndihmojnë në zbardhjen e rrethanave të rastit.
Me urdhër të prokurorit, rasti është cilësuar ‘Grabitje’, ndërsa veprimet tjera ligjore do merren varësisht nga zhvillimi i hetimeve./Gazeta Sinjali
