Gazeta Sinjali pati raportuar në nëntor të vitit të kaluar se si doktori Iljasa Fazliu, defektolog i Logopedisë, kishte keqtrajtuar një fëmijë me autizëm. Ai është arrestuar nën dyshimin se ka keqtrajtuar një 3-vjeçare, teksa po e trajtonte në qendrën rehabilituese defektologjiko-logopedike AAR LOGO PLUS. Arrestimi i tij erdhi pasi i njëjti fillimisht u sulmua nga prindi i një fëmije, ku Sinjali ka siguruar pamje ekskluzive të rrahjes së mjekut i cili e akuzoi për keqtrajtim të vajzës së tij me autizëm. Fazliu është rikthyer në punë si ushtrues i detyrës së shefit të shërbimit të Logopedisë në Qendrën Klinike Universitare të Kosovës, pozitë kjo të cilën e kishte marrë në shtator të këtij viti.
Këtë veprim po e kundërshtojnë nga Qendra për Informim dhe Përmirësim Social (QIPS). Këta të fundit kanë dorërëzuar ankesë në Shërbimin Spitalor Klinik e Universitar të Kosovës (ShSKUK).
QIPS-i ka kërkuar dorëheqjen e Fazliut dhe hetimin e komisionit disiplinor.
“QIPS, me rastin e abuzimit të fëmijës nga Iljasa Fazliu ka kërkuar dorëheqjen e tij dhe hetimin e komisionit disiplinor me anë të një ankese drejtuar drejtores së ShSKUK, Dr. Narqize Hoxhaj-Arenliu. Me anë të kësaj ankese është njoftuar gjithashtu Inspektorati Shëndetësor dhe Ministria e Shëndetësisë”, thuhet në njoftimin e QIPS-it.
Tutje, ata kanë thënë se po presin gjatë kësaj jave një përgjigje ndaj ankesës së tyre, “e cila duhet të rezultojë në shkarkimin e menjëhershëm të Iljasa Fazliut pasi që ai paraqet rrezik për shëndetin publik”.
“Vendime të cilat normalizojnë dhunën dhe amnistojnë abuzuesit në institucione publike nuk duhet të pranohen, rrjedhimisht çdo përgjigje e cila nuk rezulton në shkarkimin e Iljasa Fazliut është e pa pranueshme”.
“Ne shpresojmë se ankesa do të adresohet së shpejti. Në rast se ShSKUK dështon në përgjegjësinë e saj për të ruajtur shëndetin dhe mirëqenien e qytetarëve, ne do të vazhdojmë të kërkojmë shkarkimin e Iljasa Fazliut në forma tjera”, përfundon njoftimi.
