Anita Haziri, vajza e Hazir Hazirit, i cili po mbahet në burgun e Serbisë që nga 8 shtatori u ka bërë thirrje urgjente institucioneve shtetërore që të ndërhyjnë në rastin e babait 77-vjeçar, meqë edhe me shëndet nuk është mirë, raporton Ekonomia Online.
Vajza e tij, Anita në një deklaratë me shkrim ka thënë për Agjencinë e Lajmeve Ekonomia Online se familjarët po jetojnë me pasiguri për shëndetin e tij pasi që siç thotë ajo nuk ka as trajtim adekuat dhe ku mund të përballet me presione të ndryshme psikologjike dhe fizike.
Haziri ishte arrestuar në pikën kufitare Merdarë nën dyshimin për “krime lufte” në Podujevë gjatë luftës së fundit në Kosovë më 1998-’99.
Më poshtë sjellim letrën e plotë:
LETER ZYRTARE – LUTJE PËR NDËRHYRJE URGJENTE
Lënda: Kërkesë urgjente për ndërhyrje institucionale lidhur me ndalimin e shtetasit të Kosovës, H.H., i cili ka 77 ditë në mbajtje nga autoritetet serbe
I nderuar/ e nderuar,
Unë, Anita Haziri,vajza e shtetasit të Kosovës H.H. (i lindur në vitin 1948), po ju drejtohem me këtë lutje të sinqertë dhe urgjente që institucionet e Republikës së Kosovës të ndërhyjnë sa më shpejt lidhur me situatën dramatike të babait tim, i cili tashmë 77 ditë po mbahet i ndaluar nga autoritetet serbe në Merdar, nën akuza të pabazuara për “krime lufte”.
Baba im është njeri i moshuar, 77 vjeçar, me gjendje të brishtë shëndetësore dhe gjatë gjithë jetës së tij ka qenë qytetar i qetë, familjar, pa asnjë të kaluar kriminale. Arrestimi i tij ka tronditur gjithë familjen tonë dhe ka shkaktuar dhimbje të madhe psikologjike dhe emocionale.
Ne po jetojmë në pasiguri të plotë dhe frikë për shëndetin e tij, sepse ai po mbahet në një mjedis ku as nuk ka siguri, as trajtim adekuat mjekësor, dhe ku mund të përballet me presione të ndryshme psikologjike dhe fizike.
Arsyetimi juridik dhe human:
• Ai është arrestuar pa prova konkrete.
• Nuk ka asnjë rrezik arratisjeje (ka familje, adresë dhe është i moshuar).
• Mosha e tij dhe gjendja shëndetësore e bëjnë mbajtjen për 77 ditë të papranueshme dhe jo humane.
• Vazhdimi i kësaj mbajtjeje paraqet rrezik real për jetën dhe dinjitetin e tij.
Ju lus që të përdorni të gjitha mundësitë ligjore, diplomatike dhe institucionale që babai im të kthehet sa më shpejt në Kosovë pranë familjes së tij.
Familja jonë po jeton ditë të vështira dhe çdo orë që kalon është e rëndë për ne. Ju kërkojmë mbështetje, zë dhe veprim.
