Vetëm gjatë muajit janar të këtij viti, sipas të dhënave të Odës së Infermierëve të Kosovës (OIK), nga Kosova kanë ikur 38 infermierë. Ndërkaq gjatë vitit 2022 Kosovën e kanë lëshuar 638 infermierë apo shtatë herë më shumë se në vitin 2021. E ikja e infermierëve në numër kaq të madh mbetet shqetësuese për Odën e Infermierëve të Kosovës. Kryetari i OIK Naser Rrustemaj thotë për “IndeksOnline” se ikja e infermierëve mbetet shumë shqetësuese.
“Deri dje unë i kam pas 38 infermierë që kanë shkuar jashtë. Të mos flas shtoja dhe numrin tjetër që shkojnë përmes agjencioneve të ndryshme, pastaj përmes individëve dhe vet. Me të vërtetë është një numër shumë i madh i profesionistëve shëndetësor, që për neve si odë është mjaftë shqetësuese. 38 vetëm këtë muaj. Po flas vetëm ajo çka dimë ne saktë prej odës”, tha ai.
Ndërkaq thotë se kërkesat e infermierëve për një pagë më të dinjitetshme dhe kushte më të mira të punës, janë injoruar tash e sa vite dhe se tashmë është vonë të parandalohet ikja e tyre.
“Tash është shumë vonë dhe të parandalohet një gjë e tillë. Pikërisht janë kushtet e punës jo të mira. Pastaj jo kompetencat e plota të tyre si dhe pagat jo të dinjitetshme si dhe ndërrimet e natës, të cilat janë mundemi me thanë simbolike”, tha ai.
Rrustemaj madje pohon se Bordi i SHSKUK-së u ka mbyll infermierëve dhe zyrën e drejtorisë dhe se tashmë ata s’kanë as ku të drejtohen.
“Që tre katër muaj a 6 muaj u bë, që infermierëve iu ka mshel një derë në QKUK. Për arsye se ka qenë zyra e drejtorisë së infermierisë dhe tani ajo nuk funksionon dhe infermierët nuk dinë ku të drejtohen. Ne nuk e dimë arsyen pse. Por shpresoj që kjo pozitë duhet të rregullohet me statut të SHSKUK-së. Sipas të gjitha gjasave sipas informatave që kam, është mbyll para një apo dy viteve dhe është lënë msheft. Është mbyll nga Bordi i SHSKUK-së”, tha ai.
Ndërkaq thotë se i mbështesin kërkesat e sindikatës së Punëtorëve Shëndetësorë të Qendrës Klinike Universitare, të cilët kanë reaguar siç thonë ata për diskriminimin që po ua bënë SHSKUK-ja dhe se kanë paralajmëruar greva dhe protesta në rast se nuk u paguhen ditët e festave, ashtu siç u paguhen mjekëve.
“Ajo është kërkesë e sindikatës që ne e mbështesim. Për arsye se nëse është një festë, është një ditë vikendi për personelin mjekësor dhe infermierët që punojnë. Besoj që duhet të jetë e barabartë. Sepse ligji duhet të jetë i barabartë dhe për mjekë dhe për infermierë dhe për profesionistët shëndetësor”, tha ai.
E thotë se në këtë gjendje në të cilën gjenden infermierët, me kushtet e punës dhe pagat e vogla, i është mbushur mendja dhe atij të largohet nga Kosova.
“Fatkeqësisht ne kemi shumë infermierë që punojnë ndoshta për 20 apo 25 vjet, e e lëshojnë vendin e punës. Tani edhe mua mu ka mbush mendja ta lëshoj Kosovën e të shkoj në vende të treta. Dhe pse e kam pas një motiv shumë të madh më herët se me asnjë çmim nuk do ta lëshoj vendin e punës, por do të qëndroj në Kosovë dhe do të kontribuoj këtu. Mirëpo tani situata si është, për një kohë të shkurtë, jo vetëm SHSKUK-ja por në tërësi Kosova, do të mbetet pa profesionistët shëndetësor. Nëse Gjermania i merr 20 mijë vetë, ne në Kosovë çfarë duhet të bëjmë. Këtë duhet ta dinë ata që janë të thirrur të kenë paga të dinjitetshme, të kenë kushte më të mira për punë”, tha ai./IndeksOnline/
