Ish-kryetari i Lëvizjes Vetëvendosje, Visar Ymeri ka komentuar marrëveshjen për targat të arritur mbrëmë në Bruksel.
Sipas tij, diskutimet për planin franko-gjerman, që raportohet të jenë pasuese të marrëveshjes gjegjëse, nuk do të jenë të lehta.
Tutje, analisti Ymeri shtoi se insistimi për të intensifikuar dialogun ka ardhur kryesisht nga perëndimi.
“Diskutimet për planin franko gjerman nuk kanë për të qenë të lehta. Edhe pala serbe do të ketë vërejtje për këtë plan. Insistimi për të intensifikuar dialogun ka ardhur kryesisht nga perëndimi. Teksti që është dakorduar dje ka disa pika pozitive për Kosovën. Një fjali thotë që marrëveshjet e së kaluarës do të zbatohen. Tash po duket se Zajednica po kalon”, tha Visar Ymeri.
Gjithashtu, analisti komentoi dhe rezistencën e qeverisë së Kosovës për të arritur marrëveshjen, e cila sipas tij u bë që të tërhiqte vëmendjen e Brukselit për të intensifikuar takimet bazuar në planin franko-gjerman.
“Kemi pasur disa kërkesa nga ndërkombëtarët për të shtyrë afatin dhe kryeministri ka qenë kundër, deri ditën e djeshme. Një prej gjërave që është thënë dje nga Vetëvendosje ka qenë që përmes rezistencës së qeverisë, është arritur që Brukseli ta marrë më seriozisht dhe u zotua për të intensifikuar takime sipas planit franko-gjerman. Dhe sipas kësaj narrative rezistenca ka qenë e domosdoshme e cila ka shkaktuar probleme në Kosovë. Në negociatat të gjithë duan të arrijnë disa fitore dhe në bazë të tyre hartojnë strategjinë”, përfundoi Ymeri.
