Një person ka rënë në prangat e Policisë në Ferizaj, pasi dyshohet se për më shumë se një muaj ka kryer disa raste të vjedhjeve në banesa dhe objekte banesore, raporton Gazeta Sinjali.
Policia ka njoftuar se pas një pune hetimore intensive, është identifikuar dhe arrestuar B. T., 28-vjeçar, i cili gjatë periudhës 1 korrik – 19 gusht 2025 ka kryer disa vjedhje, duke marrë dy trotinete elektrike dhe dy biçikleta, me vlerë rreth 4 mijë e 220 euro.
Të njëjtat, sipas Policisë, ai i kishte shitur personave të tjerë, duke iu treguar paraprakisht se ishin të vjedhura.
Sendet e vjedhura tashmë janë sekuestruar dhe do t’u kthehen pronarëve ligjorë.
Ndërkohë, ndaj dy personave të tjerë, G. B., 33 vjeç dhe B. H., 25 vjeç, është iniciuar rasti penal “Blerja, pranimi ose fshehja e sendeve të përfituara nga vepra penale”, pasi të njëjtit kanë pranuar se ishin në dijeni për origjinën e sendeve.
Me urdhër të Prokurorit të Shtetit, i dyshuari B. T. është ndaluar për 48 orë për procedura të mëtejme hetimore./Gazeta Sinjali
