Presidenti i Serbisë, Aleksandar Vuçiq, ka dhënë një intervistë alarmante në televizionin “Informer” mbrëmjen e së enjtes, ku ka bërë disa deklarata që kanë shkaktuar shqetësim të madh në opinionin publik, raporton Nova, transmeton Kossev.
Një nga deklaratat më tronditëse ishte pranimi i tij se në mendjen e tij po shfaqen mendime të errëta dhe dëshira për hakmarrje.
Kam frikë se në kokën time ka filluar të lindë diçka e keqe – një mendim se si t’u kthej të gjitha të këqijat atyre që i kanë bërë keq mua, familjes time, fëmijëve të mi dhe të gjithëve”, tha Vuçiq, duke shtuar se “lufton çdo ditë kundër këtij impulsi”.
Vuçiq më tej pranoi me një ton të ashpër se për policinë nuk do të ishte asnjë problem të shpërndante edhe turma me dhjetëra mijëra protestues brenda pak minutash. Duke përmendur protestat e fundit në Beograd, ai tha: “Nuk është problem për policinë të ndërhyjë edhe para 30.000 vetave në dy minuta”.
Në intervistë, presidenti serb foli edhe për një bisedë me vëllain e tij, Andrej Vuçiq, ku sugjeroi hapur se Serbia dhe buxheti shtetëror shihen si pronë personale. “Gabimi yt ishte që u more me mirëqenien e njerëzve, duke harruar forcimin e sistemit”, i kishte thënë vëllai i tij.
Një tjetër pikë që ngriti polemika ishte akuzimi indirekt ndaj një zyrtari të Ambasadës Britanike, njëfarë Avramovici, për përpjekje destabilizimi në jug të Serbisë. Edhe pse Vuçiq tha se nuk kishte prova për përfshirjen e drejtpërdrejtë të ambasadës britanike, ai përmendi “informacione të shërbimeve serbe” që “nuk janë për publikun”.
Në fund të intervistës, Vuçiq sulmoi ashpër studentët protestues dhe veteranët që i mbështesin, duke i quajtur “kriminelë”. “Më vjen të qaj nga mërzia dhe të godas veten. Kush jeni ju që mendoni se mund të bëni çfarë të doni?”, deklaroi ai në një shpërthim emocional.
Kjo paraqitje publike e presidentit Vuçiq ka ngritur shqetësime serioze lidhur me gjendjen e tij emocionale dhe stabilitetin politik në Serbi, vlerësojnë analistët.
