Presidenti i Serbisë Aleksandar Vuçiq, pas mbledhjes së Këshillit të Sigurisë Kombëtare, u bëri thirrje serbëve në veri të Kosovës që të jenë të qetë dhe paqësor dhe të mos bien në provokime, si dhe të respektojnë KFOR-in dhe EULEX-in.
Ai tha se serbët në Kosovë duhet t’i besojnë KFOR-it.
Mesazhi im është respektoni EULEX-in, KFOR-in, mos i lejoni që t’ju provokojnë. Ne nuk jemi kundër KFOR-it, as kundër EULEX-it, as kundër askujt. Ne vetëm duam të shpëtojmë popullin tonë në Kosovë”, tha Vuçiq.
Ai bëri thirrje për respektimin e marrëveshjes së Brukselit dhe formimin e asociacionit.
Mesazhi për popullin tonë në Kosovë është se sado e vështirë të jetë për të gjithë njerëzit, nuk ka dorëzim – ne jemi me ju.” përfundoi Vuçiq.
Vuçiq ka thënë se serbët në Kosovë i pret një natë e vështirë.
“Shpresoj të kemi garanci nga KFOR-i, nga Evropa, se nuk do të ndërmarrin veprime të dhunshme ndaj demonstruesve. Shpresojmë që kështu të shkojë. Ne vazhdojmë të flasim me ta, kjo është puna jonë”, tha Vuçiq.
“U bëj thirrje serbëve në veri të Kosovës që të jenë të qetë dhe të mos bien në provokime”, shtoi ai.
