Ka filluar seanca gjyqësore në të cilën pritet të shpallet aktvendim mbi padinë e LVV-së ndaj projektit të Ndërmarrjes Publike Banesore për ndërtimin e objektit afaristo-banesor në lagjen “Lakrishte”.
Në sallën e gjyqit të pranishëm janë edhe zyrtarë të Lëvizjes Vetëvendosje, Qendra në Prishtinë, si dhe deputetët Sali Zyba, Enver Haliti, Enver Dugolli e Adnan Rrustemi, raporton Paparaci.
VV-ja i ishte drejtuar në muajin gusht Gjykatës Themelore të Prishtinës, me padi për caktimin e masës së sigurisë ndaj kontratës “për ndërtimin e objektit të përbashkët banesor-afarist”, e lidhur mes NPB-së dhe një konsorciumi privat.
Lidhur me rastin, NPB-ja është ballafaquar në gjykatë edhe me padi nga Qeveria e Kosovës, por rastin e ka fituar me vendim të formës së prerë të gjykatës.
Më 21 prill të këtij viti, Gjykata e Apelit ka refuzuar padinë e Qeverisë së Kosovës për caktimin e masës së sigurisë ndaj projektit të iniciuar nga NPB-ja.
Po ashtu, paraprakisht në muajin shkurt, Gjykata Themelore në Prishtinë e ka rrëzuar të njëjtën padi të Qeverisë së Kosovës kundër Ndërmarrjes Publike Banesore.
Projekti për objektin afaristo-banesor në “Lakrishtë”, i cili është iniciuar nga NPB-ja dhe do të ndërtohet në partneritet publiko-privat, ishte pezulluar pas padisë së ushtruar nga Ministria e Ambientit.
