Burime të Albanian Post bëjnë të ditur se Xhelal Sveçla ka dërguar Inspektoratin Policor në Mitrovicë për të hetuar pse hetuesit ndalën procesin e numërimit të votave
Sipas burimeve të Albanian Post, Ministri në detyrë i Punëve të Brendshme, Xhelal Sveçla, ka urdhëruar Inspektoratin Policor të Kosovës (IPK) që të dërgojë ekipe në Mitrovicë të Jugut për të intervistuar hetuesit që morën vendimin për ndërprerjen e procesit të numërimit të votave në Qendrën Komunale të Numërimit.
Vendimi i Sveçlës vjen pas ndërhyrjes së Prokurorisë dhe Policisë, që mbrëmë ndalën përkohësisht procesin pas raportimeve për dyshime të manipulimit me vota.
Prokurori Shpëtim Peci kishte urdhëruar që numërimi të vazhdojë, por situata mbetet e tensionuar pasi komisionerët e opozitës ende nuk janë kthyer në qendër, duke kërkuar hetim të plotë para rifillimit të punës.
Në zgjedhjet e 9 nëntorit, Faton Peci i Lëvizjes Vetëvendosje doli i pari në Mitrovicë, duke mposhtur kandidatin e PDK-së, Arian Tahiri./Albanina POST
