Podujevë, 13 gusht 2025 – Xhemaj Hasani ka shpallur zyrtarisht kandidaturën e tij për kryetar të Komunës së Podujevës në zgjedhjet lokale të 12 tetorit. Ai do të garojë nën logon e Nismës Socialdemokrate, duke marrë mbështetjen e plotë të strukturave të partisë dhe veçanërisht të kryetarit Fatmir Limaj.
Në njoftimin e tij drejtuar qytetarëve, Hasani shprehet se për katër vite me radhë ka qenë zëri opozitar në komunë, duke qëndruar në anën e qytetarëve dhe duke ngritur çështje të rëndësishme për interesin publik.
“Podujevës i duhet një qeverisje e mirë, transparente, energjike dhe me duar të pastra”, deklaroi Hasani, duke shtuar se synon fitoren që në raundin e parë.
Ai u shpreh mirënjohës për përkrahjen e marrë dhe u bëri thirrje qytetarëve që më 12 tetor t’i japin besimin për të sjellë ndryshimin që, sipas tij, Podujeva e meriton.
