Pas takimit Kurti-Vuçiq, të shtunën e 18 marsit, BE kishte njoftuar se Kosova ka pranuar nënshkrimin e marrëveshjes së Asociacionit të Komunave me shumicë serbe. “Kosova është pajtuar të filloj menjëherë, kur them menjëherë e nënkuptoj që menjëherë do të aranzhoj, rregullimet për të siguruar një nivel të mirëfilltë të vet-menaxhimit të komunitetit serb në Kosovë”, kështu ka deklaruar Përfaqësuesi i Lartë i BE-së, Joseph Borrell. Menjëherë pas tij ka reaguar edhe kryeministri Kurti i cili u shpreh për Asociacioni se nuk është vetë qeverisje e serbëve por është vetë menaxhim.
Lidhur me këto zhvilllime në Ohër, analisti i njohur politik Visar Ymeri, në një intervistë të dhënë për Periskopin ka thënë se Kurti duhet ta tërheq akuzën për tradhti që e kishte bërë ndaj Thaçit e Mustafës për shkak të “Zajednicës” ose i duhet ta mbajë edhe mbi vete të njëjtën akuzë e stigmë.
”Kryeministri Kurti, pas takimit në Ohër dhe përmes takimit në Ohër, përfundimisht është shëndërruar në politikan kosovar sikur tjerë kryeministra para tij. Pra e ka kuptuar se nuk mundesh dhe nuk bën të ballafaqohet me partnerët perëndimor të Kosovës në çështjet sikur dialogu me Serbinë; nuk mundesh dhe nuk bën ta kuptosh politikën si luftë pakompromis, por që kompromisin, veçanërisht në dialogun me Serbinë, duhet ta kuptosh si vlerë dhe mundësi; dhe në fund se marrëveshjet e arritura duhen zbatuar dhe nuk ka si t’u iket atyre. Kurti në Ohër ka marrë përsipër ta nisë dhe ta përfundoj procesin e themelimit të Asociacionit si një marrëveshje e nënshkruar më herët nga Kryeministri Thaçi. Nëpër këtë process kanë kaluar secili nga kryeministrat e Kosovës, kush me shumë e kush më pak. KM Kurti duhet të dal dhe ta shpjegojë pse një marrëveshje e tillë sikur ajo në Ohër paska qenë e pashmangshme, pse të gjitha ato pika e propozime asnjëherë nuk i janë marrë parasysh; si dhe ta shpjegojë pastaj pse ka ndryshuar qëndrimet e mëhershme të tijë e ta tërheq tërë atë vnerr a mal me akuza që u ka bërë liderëve tjerë për shkak të veprimeve të njëjta me këto që sot po i bën vet. Më një fjalë ose Kurti do ta tërheq akuzën për tradhti që e kishte bërë ndaj Thaçit e Mustafës për shkak të “Zajednicës” ose Kurti ta mbajë edhe mbi vete të njëjtën akuzë e stigmë’‘ tha Ymeri.
Ymeri u shpreh se mbase edhe mund t’i ndërrohet emri Asociacionit por që sipas tij pak rëndësi kanë deklaratat e Kurtit, pasi që Asociacioni do të zbatohet në bazë të marrëveshjeve paraprake të vitit 2013.
”Asociacioni do të zbatohet në bazë të marrëveshjeve paraprake (2013, e ndoshta me elemente edhe të 2015) si dhe me kombinimin e praktiave të ndryshme evropiane që janë të zbatueshme në rastin e Kosovës. Mbase edhe emri i ndërrohet. Por ai do të jetë i bazuar në marrëveshjen e vitit 2013 sepse aty e ka themelin juridik. Deklarimet e KM Kurti dhe të Presidentit të Serbisë kanë më pak rëndësi. Me rëndësi është teksti i Statutit të cilin do ta kemi fillimisht si propozim e pastaj si tekst final dhe të miratuar. Ai e determinon formën dhe statusin e Asociacionit e jo deklarimet e politikës ditore. Kemi pasur deklarime të fuqishme në procesin e dialogut deri tash. Nuk kanë ndryshuar ndonjë gjë thelbësore në process e as në Marrëveshjen dakordimin për të cilën e dëgjuam të shtunën në Ohër” tha ai.
Sipas Ymerit insistimi i SHBA-ve për arritjen e një marrëveshje midis Kosovës dhe Serbisë, vjen për shkak të situatës së sigurisë në Evropë. Të cenuar si pasojë e invazionit rus në Ukrainë dhe se pa përfshirjen e SHBA-ve, procesi i dialogut nuk do të kishte përparuar.
”Mendoj që pa përfshirjen e ShBA-ve procesi i dialogut nuk kishte përparuar fare. Kemi pasur një stërzgjatje të tij prej vitit 2011 kur ka filluar e me suksese të herëpashershme por me stagnime më të thella e më të gjata. Tash, për shkak të situatës së sigurisë në Evropë, e cenuar kjo si pasojë e invazionit rus në Ukrainë, kemi një kthim të jashtëzakonshëm të interesimit të ShBA-ve për rajonin e pastaj edhe të BE-së më të njëjtin intenzitet. Kjo është positive. E ardhmja evropiane për vendet e Ballkanit kur merret dhe kuptohet seriozisht dhe e sigurtë, është forca më e madhe transformative të politiakve dhe shoqërive të vendeve të Ballkanit. Në këtë drejtim dhe me këtë qëllim e shoh edhe përfshirjen e ShBA-ve veçanërisht por edhe nxitjen për dialog intenziv e marrëveshje mes Kosovës dhe Serbisë” u shreh Ymeri për Periskopin.
Lidhur me takimin e të shtunës në Ohër, kryeministri Kurti ende nuk është prononcuar për media, ndërsa pritet të raportoj me 23 mars në Kuvendin e Kosovës.
