Një sasi e vogël e substancës së dyshuar narkotike është gjetur të dielën në fshatin Sllatinë të Vushtrrisë, nga një qytetare që po kalonte rastësisht në rrugë.
Burime të Sinjalit bëjnë me dije se më 22 qershor 2025, rreth orës 13:30, në Stacionin Policor është paraqitur T.B , e cila ka raportuar se përderisa po ecte në rrugën e fshatit Sllatinë në drejtim të qytetit, kishte vërejtur në skaj të rrugës disa qese të dyshimta.
Sipas saj, bëhej fjalë për 11 qese të vogla me substancë të dyshuar narkotike, të cilat ajo i ka marrë dhe i ka dorëzuar në Polici.
Njësia e hetimeve është njoftuar menjëherë dhe ka konfiskuar substancën, që peshonte gjithsej 10 gramë. Dëshmitarja është intervistuar në cilësinë e raportueses, ndërkohë që nuk ka asnjë person të dyshuar në lidhje me rastin.
Me urdhër të prokurorit kujdestar, rasti është iniciuar si “Posedim i paautorizuar i narkotikëve, substancave psikotrope apo analoge” dhe hetimet janë në vijim.
