Deklarata për perspektivën euroatlantike të Ukrainës, të cilën kryeministri në largim Dritan Abazovic e nënshkroi dje me Presidentin e Ukrainës, Vladimir Zelensky, fillimisht i është drejtuar presidentit të Malit të Zi, Milo Gjukanoviç, si një deklaratë që do të nënshkruhet nga krerët e shteteve, mëson mediumi malazias “Pobjeda.me”, transmeton gazeta online Reporteri.net.
Ai dokument i është dërguar kabinetit të Gjukanoviçit nga Ambasada e Ukrainës në Mal të Zi.
Sipas informacioneve të Pobjeda-s, Kabineti i Presidentit malazez ka kërkuar mendim për tekstin e deklaratës nga Ministria e Punëve të Jashtme, Ambasada malazeze në Kiev dhe Misioni malazez në NATO.
Presidenca malaziase priste përgjigje nga mesi i dhjetorit, por në vend të kësaj, përmes mediave u njoftuan se Deklaratën me Zelenskin e kishte nënshkruar kryeministri në largim Dritan Abazoviç.
“Javën e kaluar i dërguam një letër Ministrisë së Punëve të Jashtme dhe kërkuam mendim edhe nga misioni malazez në NATO dhe nga ambasada malazeze në Kiev për tekstin e Deklaratës, kërkuam një përgjigje deri në mes të dhjetorit në mënyrë që pas marrjes së mendimit të vendosim nëse do të nënshkruajmë një deklaratë dypalëshe të këtij lloji, por dje nga mediat na njoftuan se kryeministri e ka nënshkruar atë tekst”, tha një burim i Pobjedës nga kabineti i Gjukanoviqit.
Nuk është e qartë se si Abazoviç e ka nënshkruar dokumentin drejtuar Gjukanoviçit dhe pse kabineti i presidentit malazez nuk është informuar për këtë. Pobjeda i kërkoi kabinetit të Abazovicit të shpjegojë se si kryeministri në largim nënshkroi dje Deklaratën me Zelenskin, por nuk mori përgjigje./Reporteri.net/
