Presidenti ukrainas, Volodymyr Zelensky, ka thënë të martën se forcat ruse kanë “shkatërruar” një të tretën e stacioneve ukrainase të energjisë, përmes sulmeve të vazhdueshme që kanë shënjestruar infrastrukturën e energjisë dhe kanë shkaktuar ndërprerje të mëdha të rrymës.
“Prej 10 tetorit, 30 për qind e stacioneve ukrainase të energjisë janë shkatërruar, duke shkaktuar ndërprerje në gjithë shtetin”, ka thënë Zelensky në Twitter.
Ai ka shtuar se “nuk ka mbetur vend për negociata me regjimin e (presidentit rus, Vladimir) Putinit”.
Disa rajone të Ukrainës, përfshirë kryeqytetin Kievin, janë përballur me probleme të energjisë, pas valës së re të sulmeve që kanë goditur objektet e energjisë më 18 tetor.
Në Kiev, operatori i energjisë, DTEK, ka thënë se ka pasur “ndërprerje” të energjisë dhe ujit për banorët e bregut të majtë të kryeqytetit.
“Inxhinierët janë duke kryer hetime dhe janë duke bërë gjithë përpjekjet e nevojshme për të rikthyer energjinë e banorëve”, ka thënë kompania përmes një postimi në Facebook.
Kryetari i Kievit, Vitali Klitschko, u ka bërë thirrje banorëve që të ruajnë rrymën “sa më shumë që është e mundshme” për të shmangur përdorimin e pajisjeve që kërkojnë konsum të madh.
Disa pjesë të rajonit Zhitomir, në perëndim të Kievit, kanë mbetur po ashtu pa rrymë, si pasojë e sulmeve, ka thënë guvernatori, Vitaliy Bunechko.
Lufta në Ukrainë ka nisur më 24 shkurt.
Presidenti rus, Vladimir Putin, e konsideron luftën si “operacion special ushtarak” për të çmilitarizuar Ukrainën.
Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.
Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre. (Rel)
